‘നഷ്ടമായത് വിലപ്പെട്ട ജീവനുകള്‍, പക്ഷേ അതിന്റെ പേരില്‍ വിദ്യാര്‍ത്ഥികളെ കുറ്റപ്പെടുത്തരുത്’: ഹൈക്കോടതി
കുസാറ്റിലെ സംഗീത പരിപാടിക്കിടെയുണ്ടായ അപകടം വേദനിപ്പിക്കുന്നതെങ്കിലും, അതിന്റെ പേരില്‍ വിദ്യാര്‍ത്ഥികളെ കുറ്റപ്പെടുത്തരുതെന്ന് ഹൈക്കോടതി.ചില സംവിധാനങ്ങള്‍ക്ക് പിഴവ് സംഭവിച്ചു. അപകടത്തില്‍ വിലപ്പെട്ട ജീവനുകളാണ് നഷ്ടമായത്. പക്ഷേ അതില്‍ ആരെയും കുറ്റപ്പെടുത്താന്‍ കോടതി താല്‍പ്പര്യപ്പെടുന്നില്ല. വിദ്യാര്‍ത്ഥികളായിരുന്നു അവിടെ ജനങ്ങളെ നിയന്ത്രിച്ചിരുന്നതെന്നാണ് മനസിലാക്കുന്നത്.
അതിന്റെ പേരില്‍ ഏതെങ്കിലും വിദ്യാര്‍ത്ഥികളെ പഴിചാരാന്‍ ആഗ്രഹിക്കുന്നില്ലെന്നും കോടതി വ്യക്തമാക്കി. ജുഡീഷ്യല്‍ അന്വേഷണം അവശ്യപ്പെട്ട് കെ എസ് യു നല്‍കിയ ഹര്‍ജിയിലാണ് കോടതി പരാമര്‍ശം.
ഏതൊക്കെ തരത്തിലുള്ള അന്വേഷണമാണ് നടക്കുന്നതെന്ന് കോടതിയ്ക്കറിയണമെന്നും സര്‍ക്കാരും സര്‍വകലാശാല അധികൃതരും നിലവിലെ അന്വേഷണം സംബന്ധിച്ച് റിപ്പോര്‍ട്ട് നല്‍കണമെന്നും കോടതി നിര്‍ദേശം നല്‍കി.
ഹര്‍ജി അടുത്ത വ്യാഴാഴ്ച്ചത്തേക്ക് മാറ്റി. കേരളത്തെ ഒന്നടങ്കം ദു:ഖത്തിലാഴ്ത്തിയ കുസാറ്റ് ദുരന്തത്തില്‍ ജുഡീഷ്യല്‍ അന്വേഷണം ആവശ്യപ്പെട്ടാണ് കെ എസ് യു സംസ്ഥാന പ്രസിഡന്റ് അലോഷ്യസ് സേവ്യര്‍ ഹൈക്കോടതിയെ സമീപിച്ചത്.
കുഞ്ഞ് ദുരൂഹസാഹചര്യത്തില്‍ മരിച്ച സംഭവം കൊലപാതകമെന്ന് പോലീസ്
കൊച്ചിയിലെ ലോഡ്ജില്‍ ഒന്നര മാസം പ്രായമുള്ള കുഞ്ഞ് ദുരൂഹസാഹചര്യത്തില്‍ മരിച്ച സംഭവം കൊലപാതകമെന്ന് പോലീസ്. കുഞ്ഞിന്റെ മാതാവിന്റെ സുഹൃത്ത് കണ്ണൂര്‍ ചക്കരക്കല്‍ സ്വദേശി ഷാനിഫ് കുറ്റം സമ്മതിച്ചതായി പോലീസ് അറിയിച്ചു. കൊലപാതകത്തില്‍ കുഞ്ഞിന്റെ അമ്മ അശ്വിനിയുടെ പങ്ക് സംബന്ധിച്ച് ചോദ്യം ചെയ്യല്‍ തുടരുകയാണ്.
കുട്ടിയുടെ തല സ്വന്തം മുട്ടില്‍ ഇടിച്ചാണ് കൊലപ്പെടുത്തിയതെന്നാണ് ഷാനിഫ് പോലീസിനോട് പറഞ്ഞതെന്നാണ് വിവരം.മരിച്ചെന്ന് ഉറപ്പു വരുത്താനായി ഷാനിഫ് കുഞ്ഞിന്റെ ദേഹത്ത് കടിച്ചെന്നും പോലീസ് വ്യക്തമാക്കി. കുട്ടിയുടെ പിതൃത്വത്തെ ചൊല്ലിയുണ്ടായ തര്‍ക്കമാണ് കൊലപാതകത്തില്‍ കലാശിച്ചതെന്നാണ് റിപ്പോര്‍ട്ട്. കുഞ്ഞിന്റെ തലയോട്ടിക്കേറ്റ ക്ഷതമാണ് മരണകാരണമെന്നാണ് പോസ്റ്റ് മോര്‍ട്ടം റിപ്പോര്‍ട്ട് വ്യക്തമാക്കുന്നത്.
കഴിഞ്ഞദിവസം രാവിലെയാണ് കുഞ്ഞിനെ മരിച്ച നിലയില്‍ എറണാകുളം ജനറല്‍ ആശുപത്രിയിലെത്തിക്കുന്നത്. പോസ്റ്റ്മോര്‍ട്ടം ചെയ്ത ഡോക്ടര്‍മാരുടെ മൊഴിയെടുത്തശേഷം പ്രതികളുടെ അറസ്റ്റ് രേഖപ്പെടുത്തും. സാമൂഹിക മാധ്യമം വഴിയാണ് ആലപ്പുഴ സ്വദേശിനി അശ്വിനിയും കണ്ണൂര്‍ സ്വദേശി ഷാനിഫും തമ്മില്‍ അടുപ്പത്തിലാകുന്നത്. എന്നാല്‍ ഇവര്‍ നിയമപരമായി വിവാഹിതരല്ല. ഡിസംബര്‍ ഒന്നിനാണ് ഒന്നരമാസം പ്രായമുള്ള കുഞ്ഞുമായി യുവതിയും യുവാവും കറുകപ്പിള്ളിയിലെ ലോഡ്ജില്‍ മുറിയെടുക്കുന്നത്.
ഒന്നരമാസം പ്രായമുളള കുഞ്ഞിന്റേത് കൊലപാതകമെന്ന് പോലീസ്
കൊച്ചിയില്‍ ദുരൂഹ സാഹചര്യത്തില്‍ മരണപ്പെട്ട ഒന്നരമാസം പ്രായമുളള കുഞ്ഞിന്റേത് കൊലപാതകമെന്ന് പോലീസ്. കുഞ്ഞിന്റെ അമ്മയുടെ സുഹൃത്ത് കണ്ണൂര്‍ ചക്കരക്കല്‍ സ്വദേശി വി.പി ഷാനിഫ് കുറ്റം സമ്മതിച്ചു. കൊലപാതകത്തില്‍ കുഞ്ഞിന്റെ അമ്മ അശ്വിനിയുടെ പങ്ക് സംബന്ധിച്ച് ചോദ്യം ചെയ്യല്‍ തുടരുകയാണ്. ഡിസംബര്‍ ഒന്നിനാണ് ഒന്നരമാസം പ്രായമുള്ള കുഞ്ഞുമായി യുവതിയും യുവാവും കറുകപ്പിള്ളിയിലെ ലോഡ്ജില്‍ മുറിയെടുക്കുന്നത്. രണ്ടാം തീയതി രാവിലെ എട്ടരയോടെ അബോധാവസ്ഥയിലായ കുഞ്ഞുമായി ഇവര്‍ ജനറല്‍ ആശുപത്രിയില്‍ എത്തുന്നത്. തൊണ്ടയില്‍ മുലപ്പാല്‍ കുടുങ്ങിയതായി സംശയിക്കുന്നതായാണ് ഇവര്‍ ഡോക്ടറോട് ആദ്യം പറഞ്ഞത്. കുട്ടിയെ ന്യൂ ബോണ്‍ ഐ.സി.യുവില്‍ പ്രവേശിപ്പിച്ചെങ്കിലും മരിച്ചു.
കുഞ്ഞിന്റെ ദേഹത്തെ മുറിവുകള്‍ ശ്രദ്ധയില്‍പ്പെട്ട ഡോക്ടറാണ് പോലീസില്‍ വിവരം അറിയിക്കുന്നത്. ഇതിനെത്തുടര്‍ന്നാണ് ഇരുവരെയും പോലീസ് കസ്റ്റഡിയിലെടുക്കുന്നത്. പോസ്റ്റ്‌മോര്‍ട്ടത്തില്‍ കുഞ്ഞിന്റെ തലയ്ക്ക് പരിക്കേറ്റതായി കണ്ടെത്തിയിട്ടുണ്ട്. കുഞ്ഞ് കയ്യില്‍ നിന്ന് വീണതാണെന്നാണ് ഇവര്‍ ആദ്യം പോലീസിന് നല്‍കിയ മൊഴി. തുടര്‍ന്നുള്ള ചോദ്യം ചെയ്യലിലാണ് കുഞ്ഞിനെ താന്‍ കൊലപ്പെടുത്തിയതാണെന്ന് യുവാവ് സമ്മതിച്ചത്. പ്രണയത്തിലായിരുന്ന ഇരുവരും കഴിഞ്ഞ ഒന്നരവര്‍ഷമായി കൊച്ചിയില്‍ പലയിടത്തായി ഒന്നിച്ച് താമസിച്ചുവരികയായിരുന്നു. ഇവര്‍ താമസിച്ചിരുന്ന കറുകപള്ളിയിലെ ലോഡ്ജ് മുറി പോലീസ് സീല്‍ ചെയ്തു.
ഓയൂരില്‍ ആറുവയസ്സുകാരിയെ തട്ടിക്കൊണ്ടുപോയ കേസ് ക്രൈംബ്രാഞ്ച് അന്വേഷിക്കും
കൊല്ലം: ഓയൂരില്‍ ആറുവയസ്സുകാരിയെ തട്ടിക്കൊണ്ടുപോയ കേസ് ക്രൈംബ്രാഞ്ച് അന്വേഷിക്കും. ഡിവൈ.എസ്.പി. എം.എം.ജോസിന് കേസ് കൈമാറി ഡി.ഐ.ജി. ഉത്തരവിട്ടു. ക്രൈംബ്രാഞ്ച് 13-അംഗ അന്വേഷണസംഘം രൂപവത്കരിച്ചു.
പ്രതികളെ കസ്റ്റഡിയില്‍ വാങ്ങുന്നതും തുടരന്വേഷണവും ക്രൈംബ്രാഞ്ച് നടത്തും. ഇതിനായി വൈകാതെ കൊട്ടാരക്കര കോടതിയില്‍ അപേക്ഷ നല്‍കും. പ്രതികളെ കോടതിയില്‍ ഹാജരാക്കുന്നതിന് ക്രൈംബ്രാഞ്ച് അപേക്ഷ നല്‍കി.
അന്വേഷണം പോലീസിന്റെ മറ്റൊരു വിഭാഗത്തിന് വിട്ടതിനുപിന്നില്‍ സേനയ്ക്കുള്ളില്‍നിന്നുള്‍പ്പെടെയുയര്‍ന്ന വിമര്‍ശനം. പിടിയിലായ മൂന്നുപേര്‍ക്കല്ലാതെ മറ്റാര്‍ക്കും സംഭവത്തില്‍ പങ്കില്ലെന്നാണ് പോലീസ് കണ്ടെത്തിയതെങ്കിലും പുറത്തുവിട്ട വിവരങ്ങളിലെ പൊരുത്തക്കേടുകള്‍ പുതിയ ഒരു വിഭാഗത്തിന് അന്വേഷണം കൈമാറാന്‍ കാരണമായി.
പ്രതികളെ കണ്ടെത്തുന്നതിനായി പോലീസ് നടത്തിയെന്നുപറയുന്ന അന്വേഷണരീതികളും വിമര്‍ശിക്കപ്പെട്ടിട്ടുണ്ട്. സാങ്കേതികതയിലൂന്നി നടത്തിയ അന്വേഷണത്തിന്റെ പുറത്തുവന്ന വിവരങ്ങള്‍ വിദഗ്ധരില്‍നിന്നുള്‍പ്പെടെ വിമര്‍ശനങ്ങള്‍ക്കിടയാക്കി. പോലീസ് പുറത്തുവിട്ട വിവരങ്ങള്‍ക്കപ്പുറം വ്യാപ്തിയുള്ളതാകാം ഓയൂര്‍ തട്ടിക്കൊണ്ടുപോകല്‍ കേസെന്നാണ് ഉയര്‍ന്ന ഉദ്യോഗസ്ഥര്‍ പറയുന്നത്.
തട്ടിക്കൊണ്ടുപോകല്‍ നടന്നതിനുപിന്നാലെ പ്രതികള്‍ പോലീസ് സ്റ്റേഷനുകള്‍ക്ക് സമീപത്തുകൂടിയും മറ്റും സഞ്ചരിച്ചുവെന്ന് പറയുന്നുണ്ട്. ആ സമയത്തൊക്കെ പോലീസ് നാടാകെ അരിച്ചുപെറുക്കുന്ന തിരക്കിലുമായിരുന്നു. എന്നിട്ടും ആരും പ്രതികളെ കണ്ടില്ലെന്നത് പോലീസിന്റെ കാര്യക്ഷമതയ്‌ക്കെതിരേയുള്ള വിരല്‍ചൂണ്ടലായി.
പ്രതികളുടെ സാമ്പത്തികബാധ്യത തീര്‍ക്കാനുള്ള വഴിയായിട്ടാണ് തട്ടിക്കൊണ്ടുപോകല്‍ ആസൂത്രണംചെയ്തതെന്നാണ് പോലീസ് പറയുന്നത്. എന്നാല്‍, മുന്‍കാല കുറ്റകൃത്യങ്ങളുടെ ചരിത്രമൊന്നുമില്ലാത്ത പ്രതികള്‍ക്ക് മൂന്നുദിവസം ഒരു തുമ്പും നല്‍കാനാകാതെ ഒളിച്ചുകഴിയാനാകുമോയെന്ന ചോദ്യവും ഉയരുന്നുണ്ട്.
തട്ടിക്കൊണ്ടുപോയ വാഹനത്തില്‍ കൂടുതല്‍ പുരുഷന്മാരുണ്ടെന്ന മൊഴികളുണ്ടായിട്ടും പോലീസ് ഇപ്പോഴും അക്കാര്യം നിസ്സാരവത്കരിച്ചതും ചര്‍ച്ചകള്‍ക്ക് വഴിവെച്ചു. തട്ടിക്കൊണ്ടുപോയ പെണ്‍കുട്ടിയുടെ സഹോദരന്‍ നല്‍കിയ മൊഴികള്‍ ആദ്യഘട്ടത്തില്‍ പൂര്‍ണമായും വിശ്വസിച്ച പോലീസ് പിന്നീട് കുട്ടിപറഞ്ഞ പലകാര്യങ്ങളും നിസ്സാരവത്കരിക്കുകയും ചെയ്തു.
നിലവില്‍ പിടിയിലായ മൂന്നുപ്രതികള്‍ മാത്രമാണുള്ളതെന്ന് ഉറപ്പിക്കുകയായിരുന്നു പോലീസ്. ഇത് സാധൂകരിക്കാന്‍തക്ക കാരണങ്ങളും പോലീസ് വെളിപ്പെടുത്തിയിരുന്നു. എന്നാല്‍, ഇവയ്ക്കപ്പുറത്തേക്കുള്ള ഇടപെടലുകള്‍ ഉണ്ടായിട്ടുണ്ടോയെന്ന സംശയമാണ് കേസ് ക്രൈംബ്രാഞ്ചിലേക്കെത്താന്‍ കാരണമായതെന്നും ഉദ്യോഗസ്ഥര്‍ ചൂണ്ടിക്കാട്ടി.
തമിഴ് സഹോദരങ്ങളെ നമ്മള്‍ ചേര്‍ത്തു നിര്‍ത്തണമെന്ന് മുഖ്യമന്ത്രി പിണറായി വിജയന്‍
തമിഴ് സഹോദരങ്ങളെ നമ്മള്‍ ചേര്‍ത്തു നിര്‍ത്തണമെന്ന് മുഖ്യമന്ത്രി പിണറായി വിജയന്‍. സമൂഹമാധ്യമങ്ങളിലൂടെയാണ് മുഖ്യമന്ത്രി കുറിപ്പ് പങ്കുവെച്ചിരിക്കുന്നത്.
ഫേസ്ബുക്കിലെഴുതിയ കുറിപ്പ്…
അതിരൂക്ഷമായ പ്രകൃതിക്ഷോഭത്തെ നേരിടുകയാണ് ചെന്നൈ നഗരം. ജീവാപായം ഉള്‍പ്പെടെയുള്ള നാശനഷ്ടങ്ങള്‍ ഉണ്ടായിരിക്കുന്നു. ഈ കെടുതിയില്‍ തമിഴ് സഹോദരങ്ങളെ നമ്മള്‍ ചേര്‍ത്തു നിര്‍ത്തേണ്ടതുണ്ട്. തമിഴ്‌നാട്ടില്‍ ഇതിനകം 5000-ല്‍ അധികം ദുരിതാശ്വാസ ക്യാമ്പുകള്‍ തുറന്നു കഴിഞ്ഞു. ജീവന്‍രക്ഷാ മരുന്നുകള്‍ ഉള്‍പ്പെടെയുള്ള പരമാവധി സഹായങ്ങള്‍ എത്തിച്ചു നല്‍കാന്‍ എല്ലാവരും മുന്‍കൈയെടുത്ത് പ്രവര്‍ത്തിക്കണമെന്ന് അഭ്യര്‍ത്ഥിക്കുന്നു. ഈ ദുരന്തത്തെ മറികടന്നു മുന്നോട്ടു പോകാന്‍ തമിഴ്‌നാടിനൊപ്പം നില്‍ക്കാം. കേരളത്തിന്റെ സഹായ സന്നദ്ധത അറിയിച്ചിട്ടുണ്ട്.
അതേസമയം, മിഷോങ് ചുഴലിക്കാറ്റിന്റെ പ്രഭാവത്തില്‍ കനത്ത മഴയെത്തുടര്‍ന്ന് വെള്ളപ്പൊക്കമുണ്ടായ ചെന്നൈയില്‍ വിമാനത്താവളം തുറന്നു. ചൊവ്വാഴ്ച രാവിലെ ഒമ്പതുമണിയോടെയാണ് വിമാനത്താവളത്തിന്റെ പ്രവര്‍ത്തനം പുനരാരംഭിച്ചത്. വൈകാതെ തന്നെ ഇവിടെനിന്ന് വിമാനസര്‍വീസുകള്‍ ആരംഭിക്കും.
വിമാനത്താവളത്തിന്റെ ചുറ്റുമുള്ള പ്രദേശങ്ങളില്‍ മഴ കുറഞ്ഞിട്ടുണ്ട്. വെള്ളം ഇറങ്ങിത്തുടങ്ങുകയും റണ്‍വേയിലും ടാക്സിവേയിലും വെള്ളക്കെട്ട് ഒഴിയുകയും ചെയ്തതോടെയാണ് വിമാനത്താവളം വീണ്ടും തുറക്കുന്നതെന്ന് അധികൃതര്‍ അറിയിച്ചു. വിമാനത്താവളത്തില്‍ കുടുങ്ങിക്കിടക്കുന്ന യാത്രക്കാര്‍ക്ക് യാത്രയൊരുക്കാനാണ് പ്രഥമപരിഗണനയെന്നും അധികൃതര്‍ വ്യക്തമാക്കി. 21 വിമാനങ്ങളും 1,5000 യാത്രക്കാരും നിലവില്‍ വിമാനത്താവളത്തില്‍ കുടുങ്ങിയിട്ടുണ്ട്.
Cars swept away in #Chennai as #CycloneMichaung dumps heavy rains #India#Cyclone #Michaung #Flood #Rain #Flooding #Pallikaranai #ChennaiFlood #Weather #Viral #Climate #waterlogging pic.twitter.com/FJpCrzvMs2
— Earth42morrow (@Earth42morrow) December 4, 2023
ചെന്നൈ വിമാനത്താവളത്തില്‍നിന്ന് പുറപ്പെടുന്നതും ഇവിടേക്ക് എത്തുന്നതുമായ എല്ലാ സര്‍വീസുകളും പുനരാരംഭിച്ചതായി ഇന്‍ഡിഗോ എയര്‍ലൈന്‍സ് അറിയിച്ചു. വെള്ളപ്പൊക്കത്തെത്തുടര്‍ന്ന് വിമാനത്താവളം അടച്ചിട്ടപ്പോള്‍ ചെന്നൈയുമായി ബന്ധിപ്പിക്കുന്ന 550 സര്‍വീസുകള്‍ തിങ്കളാഴ്ച റദ്ദാക്കിയിരുന്നു. ഇത് രാജ്യത്താകമാനം 1,000 സര്‍വീസുകളെ ബാധിച്ചുവെന്നും അവര്‍ അവര്‍ വ്യക്തമാക്കി.
പ്രളയത്തെത്തുടര്‍ന്ന് ചെന്നൈയില്‍ മരണം എട്ടായി. വെള്ളക്കെട്ടിനെത്തുടര്‍ന്ന് 17 സബ്വേകള്‍ അടച്ചതായി പോലീസ് അറിയിച്ചു. തമിഴ്നാട്ടിലെ നാലു ജില്ലകളിലെ വിദ്യാഭ്യാസ സ്ഥാപനങ്ങള്‍ക്ക് സര്‍ക്കാര്‍ ബുധനാഴ്ചയും അവധി പ്രഖ്യാപിച്ചിട്ടുണ്ട്. ചെന്നൈ, കാഞ്ചീപുരം, തിരുവള്ളൂര്‍, ചെങ്കല്‍പേട്ട് ജില്ലകളിലാണ് അവധി. ഈ ജില്ലകളില്‍ ചൊവ്വാഴ്ച പൊതു അവധിയായിരുന്നു.
അതേസമയം, മിഷോങ് ചുഴലിക്കാറ്റ് ആന്ധ്രാപ്രദേശിലെ നെല്ലൂരിനും മച്‌ലിപട്ടണത്തിനും ഇടയില്‍ കരതൊട്ടു. മണിക്കൂറില്‍ 110 കിലോമീറ്ററാണ് വേഗം. ആന്ധ്രാപ്രദേശിലെ തിരുപ്പതി, നെല്ലൂര്‍, പ്രകാശം, ബപട്ല, കൃഷ്ണ, ഗോദാവരി, കൊനസീമ, കാക്കിനട ജില്ലകളില്‍ റെഡ് അലര്‍ട്ട് പ്രഖ്യാപിച്ചിട്ടുണ്ട്. സ്‌കൂളുകള്‍ ഉള്‍പ്പെടെയുള്ള വിദ്യാഭ്യാസ സ്ഥാപനങ്ങള്‍ക്ക് അവധി നല്‍കി.
അതേസമയം, ചെന്നൈയില്‍ മഴയുടെ തീവ്രത കുറഞ്ഞെങ്കിലും വെള്ളക്കെട്ടും ദുരിതവും തുടരുന്നു. ഡാമുകള്‍ തുറന്നിരിക്കുന്നതിനാല്‍ നഗരത്തില്‍ നിന്ന് വെള്ളം ഇറങ്ങുന്നില്ല. ചെന്നൈ, കാഞ്ചീപുരം, ചെങ്കല്‍പ്പെട്ട്, തിരുവള്ളൂര്‍ ജില്ലകള്‍ക്ക് ഇന്നും നാളെയും അവധി പ്രഖ്യാപിച്ചിട്ടുണ്ട്. കൂടുതല്‍ ട്രെയിന്‍ സര്‍വീസുകള്‍ റദ്ദാക്കി. മെട്രോ ട്രെയിന്‍ സര്‍വീസ് നടത്തും. അതേസമയം, ചെന്നൈ വിമാനത്താവളത്തിന്റെ പ്രവര്‍ത്തനം പുനരാരംഭിച്ചു.
West Mambalam MATINEE Subway, 2015 Chennai Floods. Brought to you by Messrs Salem Shankar and Narayana Ganapadigal. Enna oru narration!pic.twitter.com/MxSW2qsGMO
— Srini Mama (@SriniMaama16) December 4, 2023
മിഷോങ് ചുഴലിക്കാറ്റിന്റെ പശ്ചാത്തലത്തില്‍ കേരളത്തിലൂടെ സര്‍വീസ് നടത്തുന്ന ഏഴ് ട്രെയിനുകള്‍ റദ്ദാക്കി. കൊല്ലം സെക്കന്തരാബാദ് സ്‌പെഷല്‍, തിരുവനന്തപുരം സെക്കന്തരാബാദ് ശബരി എക്‌സ്പ്രസ്, സെക്കന്തരാബാദ് തിരുവനന്തപുരം ശബരി എക്‌സ്പ്രസ്, എറണാകുളം പട്‌ന എക്‌സ്പ്രസ്, ചെന്നൈ തിരുവനന്തപുരം സൂപ്പര്‍ ഫാസ്റ്റ്, ചെന്നൈ ഗുരുവായൂര്‍ എക്‌സ്പ്രസ്, ഡല്‍ഹി തിരുവനന്തപുരം കേരള എക്‌സ്പ്രസ് എന്നിവയാണ് റദ്ദാക്കിയത്.
A well managed chennai.. by the anti sanathani team #ChennaiFlood #ChennaiRain #ChennaiHelps @Portalcoin #cyclone pic.twitter.com/Z3atM36O7c
— Kartik (@Kartikober) December 5, 2023
ചെന്നൈയിലെ ദുരിതബാധിത മേഖലകള്‍ സന്ദര്‍ശിച്ച തമിഴ്‌നാട് മുഖ്യമന്ത്രി എം.കെ. സ്റ്റാലിന്‍, ഏഴു മന്ത്രിമാര്‍ക്ക് ദുരിതാശ്വാസ പ്രവര്‍ത്തനങ്ങളുടെ മേല്‍നോട്ട ചുമതലയും 9 ഐഎഎസ് ഉദ്യോഗസ്ഥര്‍ക്ക് ഏകോപന ചുമതലയും നല്‍കി. ഒന്‍പതിനായിരത്തോളം ആളുകളാണ് തമിഴ്‌നാട്ടില്‍ ദുരിതാശ്വാസ ക്യാംപുകളില്‍ കഴിയുന്നത്.
ചെന്നൈ നഗരത്തിലെ വൈദ്യുതി ബന്ധം ഇന്നു വൈകിട്ടോടെ ഭാഗികമായെങ്കിലും പുനഃസ്ഥാപിക്കും. ഇതിനായി 5000 ത്തോളം ജീവനക്കാരെ വൈദ്യുതി വകുപ്പ് നിയമിച്ചു.
വിസ നിയന്ത്രണവുമായി യുകെ
രാജ്യത്തേക്കുള്ള കുടിയേറ്റം കുറയ്ക്കുന്നതിന്റെ ഭാഗമായി കൂടുതല്‍ നിയന്ത്രണങ്ങള്‍ ഏര്‍പ്പെടുത്തി യു.കെ. വിദേശത്തുനിന്ന് തൊഴില്‍ തേടി യു.കെ.യിലെത്തുന്നവരുടെ എണ്ണം ക്രമാതീതമായി വര്‍ദ്ധിക്കുകയാണ്. അതുകൊണ്ട് കുടിയേറ്റനിയന്ത്രണത്തിന്റെ ഭാഗമായി വിസാ നിയമങ്ങള്‍ കൂടുതല്‍ കര്‍ശനമാക്കുകയാണെന്ന് യു.കെ. പ്രധാനമന്ത്രി ഋഷി സുനക് വ്യക്തമാക്കി. ടോറി പാര്‍ട്ടിയില്‍ നിന്നുള്ള എംപിമാരുടെ നിര്‍ബദ്ധത്തിന് വഴങ്ങിയാണ് പ്രധാനമന്ത്രി പുതിയ വിസ നിയമങ്ങള്‍ അവതരിപ്പിച്ചത്. മിനിമം സാലറിയുള്‍പ്പെടെയുള്ള പുതിയ മാറ്റങ്ങള്‍ മൂന്നു ലക്ഷത്തോളെ പേരെ ബാധിക്കുമെന്നാണ് കരുതുന്നത്. മറ്റു രാജ്യങ്ങളില്‍ നിന്ന് ആളുകള്‍ കുടിയേറുന്നതിന്റെ നിരക്ക് വളരെ കൂടുതലായിരുന്നു. അത് നിയന്ത്രിക്കാന്‍ താന്‍ നിര്‍ബന്ധിതായതാണെന്നാണ് പ്രധാനമന്ത്രി പറയുന്നത്.
വിസാ നിയമങ്ങളില്‍ ഏര്‍പ്പെടുത്തുന്ന നിയന്ത്രണങ്ങള്‍ കുടിയേറ്റതോത് കുറയ്ക്കുമെന്നും അത് രാജ്യത്തിന് ഗുണംചെയ്യുമെന്നുമാണ് സുനകിന്റെ അഭിപ്രായം. നിയമങ്ങള്‍ കര്‍ശനമാക്കിയാല്‍ യു.കെ.യിലേക്ക് കുടിയേറ്റം നടത്തുന്നവരില്‍ മൂന്നുലക്ഷത്തോളം പേരുടെയെങ്കിലും കുറവ് ഉണ്ടാകുമെന്നാണ് നിഗമനം. 2024 ഏപ്രലിലോടെ പുതിയ നിയന്ത്രണങ്ങള്‍ പ്രാബല്യത്തില്‍വന്നേക്കും.
ഹോം സെക്രട്ടറി ജെയിംസ് ക്ലവര്‍ലി കഴിഞ്ഞ ദിവസം പാര്‍ലമെന്റില്‍ അവതരിപ്പിച്ച പുതിയ കുടിയേറ്റ നിയമഭേദഗതിയിലാണ് പ്രഖ്യാപനം. കെയറര്‍ വിസകളുടെ ദുരുപയോഗം തടയുന്നതിനാണ് നിയന്ത്രണമേര്‍പ്പെടുത്തിയതെന്ന് ക്ലവര്‍ലി അറിയിച്ചു. സന്ദര്‍ശക, വിദ്യാര്‍ഥി വിസാ ചട്ടങ്ങളില്‍ നിയന്ത്രണങ്ങള്‍ കൊണ്ടുവന്നതിന് പിന്നാലെയാണ് പുതിയ നടപടിയെടുത്തിരിക്കുന്നത്.. യു.കെയിലേക്ക് കുടിയേറാന്‍ കാത്തിരിക്കുന്ന നൂറ് കണക്കിന് മലയാളികള്‍ക്കാണ് നിയന്ത്രണം തിരിച്ചടിയായിരിക്കുന്നത്.
പ്രധാനമായും കൊണ്ടുവന്ന നിയന്ത്രണങ്ങള്‍…
1. ജോലിക്കോ പഠിക്കാനോ യുകെയില്‍ വരുന്നവരുടെ കൂടെ ആശ്രിതവിസയില്‍ വരുന്നവരുടെ എണ്ണം കുറയ്ക്കാന്‍ തീരുമാനിച്ചു. കുടിയേറുന്നവരുടെ എണ്ണം കുറയ്ക്കാനുള്ള ഏറ്റവും പ്രധാനപ്പെട്ട നീക്കമായാണ് ഇതിനെ വിലയിരുത്തുന്നത്.
2. ശമ്പള പരിധി നിശ്ചയിച്ചു. മറ്റു രാജ്യങ്ങളില്‍ നിന്ന് ജോലിക്കായി കുടിയേറുന്നവര്‍ക്ക് ഏറ്റവും കുറഞ്ഞ ശമ്പള പരിധി നിശ്ചയിച്ചു. ആ പരിധിക്കു മുകളില്‍ ശമ്പളം ഉള്ളവര്‍ക്ക് മാത്രമേ ഇനി മുതല്‍ യുകെയിലേക്ക് ജോലിക്ക് വരാന്‍ സാധിക്കുകയുള്ളു. പുറത്തു നിന്നു വരുന്ന കുടുംബങ്ങളെ സ്‌പോണ്‍സര്‍ ചെയ്യുന്ന യുകെ പൗരരായവര്‍ക്കും ശമ്പള പരിധി നിശ്ചയിക്കും. മറ്റുരാജ്യങ്ങളില്‍ നിന്ന് വരുന്നവര്‍ക്കുള്ള ശമ്പള പരിധി 26,200 പൗണ്ടില്‍ നിന്ന് 38,700 പൗണ്ടാക്കി വര്‍ധിപ്പിച്ചു.
3. ആരോഗ്യപ്രവര്‍ത്തകര്‍ക്ക് നല്‍കുന്ന ഹെല്‍ത്ത് കെയര്‍ വിസയിലും നിയന്ത്രണങ്ങള്‍ കൊണ്ടുവരും. മറ്റു രാജ്യങ്ങളില്‍ നിന്ന് യുകെയിലേക്ക് കുടിയേറുന്ന ആരോഗ്യപ്രവര്‍ത്തകര്‍ക്ക് ഇനി മുതല്‍ ഡിപെന്‍ഡന്റ്‌സായി ആളുകളെ കൊണ്ടുവരാന്‍ സാധിക്കില്ല. ആരോഗ്യമേഖലയില്‍ കെയര്‍ ക്വാളിറ്റി കമ്മീഷന്‍ അംഗീകരിച്ച ജോലികള്‍ ചെയ്യുന്നവര്‍ക്ക് മാത്രമേ കമ്പനികളില്‍ നിന്ന് സ്പോണ്‍സര്‍ഷിപ്പ് സ്വീകരിക്കാന്‍ സാധിക്കുകയുള്ളു.
4. ജോലിക്ക് ആളെ ലഭിക്കാത്ത മേഖലകളില്‍ ശമ്പള പരിധിയില്‍ 20 ശതമാനം ഇളവുനല്‍കുന്നത് എടുത്ത് മാറ്റി. ആളെ ലഭിക്കാന്‍ ബുദ്ധിമുട്ടുള്ള ജോലികളുടെ പട്ടിക പ്രത്യേകമായി തയാറാക്കും.
5. വിദ്യാര്‍ഥികളുടെ ഡിപെന്‍ഡന്റ്‌സ് ആയി കുടുംബാംഗങ്ങള്‍ വരുന്നതിനും യുകെ നിയന്ത്രണമേര്‍പ്പെടുത്തി. ഇത് കുടിയേറുന്നവരുടെ എണ്ണത്തില്‍ വലിയ കുറവുണ്ടാക്കുമെന്നു കരുതുന്നു. 2023 സെപ്റ്റംബര്‍ മാസം വരെ 153,000 വിസകള്‍ ഇത്തരത്തില്‍ കുടുംബാംഗങ്ങള്‍ക്ക് നല്‍കിയതായാണ് കണക്ക്.
2023 ജൂണ്‍വരെ മാത്രം എഴുപത്തായ്യായിരത്ത് എഴുന്നൂറ്റിപതിനേഴ് ആശ്രിത വിസകളാണ് യു.കെ അനുവദിച്ചത്. 2022-ല്‍ ചരിത്രത്തിലാദ്യമായി ഏഴ്‌ലക്ഷത്തിനാല്‍പ്പത്തയ്യായിരം പേരാണ് യു.കെയിലേക്ക് കുടിയേറിയത്. 2023-ലെ കണക്കും ചെറുതല്ല. ജൂണ്‍വരെ മാത്രം ആറുലക്ഷത്തി എഴുപത്തിരണ്ടായിരം പേര്‍ കുടിയേറിയെന്നാണ് ഔദ്യോഗിക കണക്കുകള്‍. നിലവിലെ നിയന്ത്രണങ്ങളിലൂടെ കുടിയേറ്റം മൂന്ന് ലക്ഷത്തോളം കുറയ്ക്കാനാകുമെന്നാണ് സര്‍ക്കാര്‍ കണക്ക് കൂട്ടുന്നത്. ആരോഗ്യമേഖല, കെയര്‍ ടേക്കര്‍, വിദ്യാഭ്യാസം എന്നീ മേഖലകളില്‍ ഏറ്റവും കൂടുതലുള്ളതും ഇന്ത്യക്കാരാണ്.
യുകെയിലെ ആരോഗ്യപരിചരണ രംഗത്തുള്ള സ്‌കില്‍ഡ് വര്‍ക്കര്‍മാരില്‍ ഏറ്റവും കൂടുതല്‍ ഇന്ത്യക്കാരാണെന്ന് ഓക്‌സ്ഫഡ് സര്‍വകലാശാലയിലെ മൈഗ്രേറ്ററി ഒബ്‌സര്‍വേറ്ററിയാണ് പഠനറിപ്പോര്‍ട്ട് പുറത്തുവിട്ടത്. 2022-23ല്‍ റിക്രൂട്ട് ചെയ്യപ്പെട്ടവരില്‍ 20 ശതമാനം ഡോക്ടര്‍മാരും 46 ശതമാനം നഴ്‌സുമാരും ഇന്ത്യയില്‍നിന്നാണ്.
നിയന്ത്രണങ്ങള്‍ കര്‍ശനമാക്കുന്നതോടെ യു.കെയിലേക്ക് കുടിയേറുന്നവര്‍ സ്വയംപ്രാപ്തരാണെന്നും സമ്പദ്ഘടനയ്ക്ക് ഗുണംചെയ്യുന്നവരാണെന്നും രാജ്യത്തിന് ബാധ്യതയാകില്ലെന്നും ഉറപ്പുവരുത്താനാകുമെന്നാണ് യു.കെ. സര്‍ക്കാര്‍ ലക്ഷ്യമിടുന്നത്. ഈ നിയമമാറ്റത്തിലൂടെ ഇത്രയുംകാലം ഭരിച്ച കണ്‍സെര്‍വേറ്റിവ് സര്‍ക്കാര്‍ പരാജയം അംഗീകരിക്കുകയാണെന്ന വിമര്‍ശനവുമായി ലേബര്‍ പാര്‍ട്ടിയില്‍ നിന്നുള്ള ആഭ്യന്തര വകുപ്പ് വക്താവ് യെറ്റെ കൂപ്പര്‍ രംഗത്തെത്തിയിട്ടുണ്ട്.
