ലോകസ്ഭ തിരഞ്ഞെടുപ്പിന് തയ്യാറെടുത്ത് സിപിഎം. ദേശീയ രാഷ്ട്രീയത്തിലെ മാറ്റങ്ങളുടെ പശ്ചാത്തലത്തില്‍ കേരളത്തില്‍നിന്നു തന്നെയാണു സിപിഎം കൂടുതല്‍ സ്ഥാനാര്‍ത്ഥികളെ ഇറക്കാന്‍ തീരുമാനിച്ചിരിക്കുന്നത്. ഇതുവഴി ദേശീയതലത്തില്‍ പാര്‍ട്ടിയുടെ സ്വാധീനവും പ്രസക്തിയും ഉറപ്പാക്കാനാണ് സിപിഎമ്മിന്റെ തന്ത്രം. കേരളത്തില്‍നിന്നു പരമാവധി എംപിമാര്‍ എന്ന ലക്ഷ്യമാണ് സിപിഎമ്മിന്റെ ലക്ഷ്യവും.
ലോക്‌സസഭാ തെരഞ്ഞെടുപ്പിനുള്ള ഇടത് സ്ഥാനാര്‍ത്ഥികളുടെ അന്തിമ ചിത്രം ഈ മാസം പകുതിയോടെ പ്രഖ്യാപിക്കുമെന്ന് എം വി ഗോവിന്ദന്‍ വാര്‍ത്തസമ്മേളനത്തില്‍ വ്യക്തമാക്കിയിരുന്നു. സ്ഥാനാര്‍ത്ഥി നിര്‍ണ്ണയത്തിനൊപ്പം തെരഞ്ഞെടുപ്പ് നയസമീപനങ്ങളും ചര്‍ച്ച ചെയ്യാന്‍ സിപിഎം, സിപിഐ നേതൃയോഗങ്ങള്‍ ഒരാഴ്ചക്കകം ചേരും. സ്ഥാനാര്‍ത്ഥി സാധ്യത ലിസ്റ്റില്‍ പ്രമുഖരുടെ വന്‍ നിരയാണുള്ളത്. ഏത് നിമിഷവും ലോക്‌സഭാ തെരഞ്ഞെടുപ്പ് പ്രഖ്യാപനം വരുമെന്നതിനാല്‍ സ്ഥാനാര്‍ത്ഥി പ്രഖ്യാപനം വൈകരുതെന്ന മട്ടിലാണ് ഇടത് ക്യാമ്പില്‍ ഒരുക്കങ്ങള്‍ നടക്കുന്നത്. 10 നും 11 നും സിപിഐ നേതൃയോഗം, 11, 12 തീയതികളില്‍ സിപിഎം സംസ്ഥാന സമിതി, രണ്ട് യോഗങ്ങളിലും പ്രധാന അജണ്ട ലോക്സഭ തെരഞ്ഞെടുപ്പുമായി ബന്ധപ്പെട്ട മുന്നൊരുക്കമാണ്.
പ്രമുഖരെ അടക്കം രംഗത്തിറക്കി ശക്തമായ പോരാട്ടത്തിനാണു കളമൊരുക്കുകയാണ് സിപിഎം. അതിനുള്ള മുന്നോരുക്കങ്ങളും പാര്‍ട്ടി ആരംഭിച്ചു. സ്ഥാനാര്‍ഥി നിര്‍ണയത്തില്‍ മുതിര്‍ന്ന നേതാക്കള്‍ സ്ഥാനാര്‍ഥികളാകുമെന്നാണു സൂചന. പിബി അംഗം എ.വിജയരാഘവന്‍, മുന്‍ മന്ത്രിമാരായ കെ.കെ.ശൈലജ, എ.കെ.ബാലന്‍, ടി.എം.തോമസ് ഐസക്, തൃശൂരില്‍ വി എസ് സുനില്‍കുമാര്‍, കെ രാധകൃഷ്ണന്‍ എന്നിവരുടെ പേരുകള്‍ ചര്‍ച്ചകളിലുണ്ട്. ഇതിനു പുറമേ ഒരു പിടി പുതുമുഖങ്ങളുമെല്ലാം സിപിഎം സാധ്യതാപട്ടികയില്‍ തുടക്കം മുതലുണ്ട്. മുന്‍ വിദ്യാഭ്യാസ മന്ത്രി സി രവീന്ദ്രനാഥ്, ഡി വൈ എഫ് ഐ നേതാവ് ജെയ്ക്ക് സി തോമസ് , സി ഐ ടി യു നേതാവ് യു പി ജോസഫ് എന്നിവരുടെ പേരുകളും പരിഗണനയിലുണ്ട്.
പത്തനംതിട്ടയില്‍ ഐസക്കോ രാജു എബ്രഹാമോ മത്സരിച്ചേക്കും. എറണാകുളത്ത് പൊതു സ്വതന്ത്രനും പാലക്കാട്ട് സ്വരാജിനും സാധ്യതയുള്ളപ്പോള്‍ വടകരയിലോ കണ്ണൂരോ കെകെ ശൈലജയോ മത്സരിപ്പിക്കാന്‍ സാധ്യത. കോഴിക്കോട്ട് ഡിവൈഎഫ്‌ഐ നേതാവ് വി വസീഫ്, ആറ്റിങ്ങലില്‍ കടകംപള്ളി സുരേന്ദ്രന്‍, കൊല്ലത്ത് ചിന്ത ജെറോം എന്നിവരെ മത്സരിപ്പിക്കുമെന്നാണ് സൂചന.
ക്ഷേമപെന്‍ഷന്‍ ഉള്‍പ്പെടെയുളള ആനുകൂല്യങ്ങള്‍ തടസപ്പെട്ടത് കേന്ദ്രസര്‍ക്കാര്‍ ആണെന്നത് വലിയതോതില്‍ ചര്‍ച്ചചെയ്യപ്പെട്ടത് തിരഞ്ഞെടുപ്പില്‍ ഗുണം ചെയ്യുമെന്നാണ് പാര്‍ട്ടിയുടെ വിലയിരുത്തല്‍. 2019 ലെ രാഷ്ട്രീയ സാഹചര്യമല്ല ഇപ്പോഴുള്ളത്, നിലവിലെ ഭരണ വിരുദ്ധത തിരഞ്ഞെടുപ്പില്‍ ബാധിക്കുമോയെന്നും സൂചനയുണ്ട്. ഡല്‍ഹിയില്‍ മുഖ്യമന്ത്രിയുള്‍പ്പെടെ കേന്ദ്ര സര്‍ക്കാരിനെതിരെ എട്ടിന് നടത്തുന്ന എല്‍ഡിഎഫ് സമരത്തിന്റെ മുന്നോടി എന്ന പേരില്‍ പാര്‍ട്ടി നടത്തുന്ന ഗൃഹസന്ദര്‍ശനം, തിരഞ്ഞെടുപ്പിനു മുന്‍പ് സര്‍ക്കാരിനെക്കുറിച്ചുള്ള ജനങ്ങളുടെ പ്രതികരണം അറിയാന്‍ ലക്ഷ്യംവച്ചുള്ളതാണ്.
നവകേരളസദസില്‍ ജില്ലകള്‍തോറും പതിനായിരങ്ങള്‍ പങ്കെടുത്തത് സര്‍ക്കാരില്‍ ജനങ്ങള്‍ക്കുള്ള വിശ്വാസമാണെന്നാണ് പാര്‍ട്ടിയുടെ കണ്ടെത്തല്‍. തിരഞ്ഞെടുപ്പ് അടുത്തിരിക്കെ വരുംദിവസങ്ങളില്‍ സോഷ്യല്‍മീഡിയയിലുള്‍പ്പെടെ വ്യാപക ക്യാംപെയ്ന്‍ തുടരും. 30 വയസിനു താഴെയുള്ള യുവാക്കളില്‍ സ്വാധീനമുണ്ടാക്കുന്നതിനു സമൂഹമാധ്യമങ്ങളില്‍ പ്രത്യേക ക്യാംപെയ്നും പുതിയ വോട്ടര്‍മാര്‍ക്കുമാത്രമായി ഗ്രൂപ്പും ആരംഭിച്ചു. തിരുവനന്തപുരവും തൃശൂരും പോലെ ബിജെപി ഒരുങ്ങിയിറങ്ങുന്ന മണ്ഡലങ്ങളില്‍ എല്‍ഡിഎഫിന്റെ പ്രചാരണ ശൈലിയിലടക്കം വലിയ മാറ്റങ്ങളുണ്ടാകും. എന്തായാലും ഒരുങ്ങിത്തന്നെയാണ് സിപിഎം. കേരളത്തില്‍ നിന്ന് പരമാവധി എംപിമാരെ ജയിപ്പിക്കാനാണ് സിപിഎം ശ്രമിക്കുന്നതെങ്കല്‍ യുഡിഎഫില്‍ സീറ്റ് ധാരണയെക്കുറിച്ചുള്ള ചര്‍ച്ചകള്‍ പുരോഗമിക്കുന്നതെയുള്ളൂ…
കോണ്‍ഗ്രസ് സ്ഥാനാര്‍ത്ഥിയാകാനുള്ള സാഹചര്യമില്ല, സ്ഥാനാര്‍ത്ഥിയാകണമെന്ന് മുതിര്‍ന്ന നേതാവ് ആവശ്യപ്പെട്ടിരുന്നു: നടന്‍ സിദ്ധിഖ്
കോണ്‍ഗ്രസ് സ്ഥാനാര്‍ത്ഥിയാകാനുള്ള സാഹചര്യമില്ലെന്ന് നടന്‍ സിദ്ധിഖ്. മൂവീ വേള്‍ഡ് മീഡിയയോടാണ് നടന്‍ തിരഞെടുപ്പില്‍ മത്സരിക്കാനുള്ള സാധ്യചതയില്ലെന്ന് പറഞ്ഞത്. കഴിഞ്ഞ തവണ സ്ഥാനാര്‍ത്ഥി ആകണമെന്ന് മുതിര്‍ന്ന നേതാവ് ആവശ്യപ്പെട്ടിരുന്നു, അന്ന് ഞാന്‍ വേണ്ടെന്ന് വച്ചു. ഇത്തവണത്തെ കാര്യം ഇതുവരെ അറിയിച്ചിട്ടില്ലന്നും വാര്‍ത്തകളില്‍ നിറഞ്ഞ് നില്‍ക്കുന്നതില്‍ സന്തോഷമെന്നും സിദ്ധിഖ് പറഞ്ഞു.
ലോക്സഭ തിരഞ്ഞെടുപ്പ് അടുത്തിരിക്കെ കോണ്‍ഗ്രസിലും ബിജെപിയിലും സിപിഎമ്മിലുമെല്ലാം ചര്‍ച്ചകള്‍ സജീവമായി നടക്കുകയാണ്. കലാ- സാംസ്‌കാരിക- സിനിമ മേഖലയില്‍ നിന്നുള്ളവരെയെല്ലാം സ്ഥാനാര്‍ത്ഥികളായി തിരഞ്ഞെടുക്കാറാണ് കേരളത്തിലെ പ്രമുഖ രാഷ്ടീയപാര്‍ട്ടികള്‍. അതിന്റെ പശ്ചാത്തലത്തില്‍ നിരവധി താരങ്ങളുടെ പേരുകള്‍ ഉയര്‍ന്നുവരാറുമുണ്ട്.
അതേസമയം, കോമഡി, കൗണ്ടര്‍, ക്യാരക്ടര്‍, വില്ലന്‍ വേഷങ്ങള്‍ എല്ലാം പലരീതിയില്‍ പയറ്റി മലയാളി പ്രേക്ഷകരുടെ ഇടയിലേക്ക് എത്തിയ നടനാണ് സിദ്ധിഖ് . ഒരുകാലത്ത് തനി മലയാളി നായകന്‍ എന്ന പരിവേഷത്തിനു സിദ്ധിഖിന് തുല്യം അദ്ദേഹം മാത്രമായിരുന്നു. കുടുംബപ്രേക്ഷകരെ ലക്ഷ്യം വച്ചുള്ള ചിത്രങ്ങള്‍ക്ക് അന്നും, ഇന്നും സ്വീകാര്യമായ ഒരേ ഒരു നടനാണ് സിദ്ധിഖ്.
ഏതു രൂപഭാവത്തെയും എളുപ്പം തന്നിലേക്ക് സന്നിവേശിപ്പിക്കാന്‍ സിദ്ധിഖിന് തന്റേതായ സാമര്‍ഥ്യമുണ്ട്. ഏതു വേഷവും മികച്ച രീതിയിലൊരുക്കാന്‍ അദ്ദേഹത്തിന്റെതായ രീതിയില്‍ പ്രത്യേക കഴിവുണ്ട്. മികച്ച വാക്ചാതുര്യവും, ഇന്റര്‍വ്യുവറുമാണ് സിദ്ധിഖ്. ബിഗ്, മിനി സ്‌ക്രീനുകളില്‍ ഒരുപോലെ നിറഞ്ഞു നിന്ന കാലവുമുണ്ട് സിദ്ധിഖിന്. ഇപ്പോള്‍ ഇളയ മകന്‍ ഷഹീന്‍ സിദ്ധിഖും സിനിമയിലെത്തിയിട്ടുണ്ട്.
അതേസമയം, മോഹന്‍ലാല്‍ ജീത്തു ജോസഫ് ടീമിന്റെ ബ്ലോക്ബസ്റ്റര്‍ ചിത്രം നേരില്‍ ശ്രദ്ധേയമായ വേഷത്തിലൂടെ വീണ്ടും ജനഹൃദയങ്ങളിലെത്തി നില്‍ക്കുകയാണ് സിദ്ധിഖ്. അഡ്വ. രാജശേഖറായി തകര്‍ത്തഭിനയിച്ച ചിത്രമാണ് സിദ്ധിഖ്. ഒടുവില്‍ തീയേറ്ററിലെത്തിയ സിനിമയാണ് നേര്.
ആശീര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരായിരുന്നു നിര്‍മാണം. അഭിഭാഷകനായെത്തുന്ന മോഹന്‍ലാലിന്റെ ത്രസിപ്പിക്കുന്ന പ്രകടനമാണ് ചിത്രത്തിന്റെ ൈഹലൈറ്റ്. അനശ്വര രാജന്റെ കരിയറിലെ തന്നെ ഏറ്റവും മികച്ച പ്രകടനത്തിനും നേര് സാക്ഷ്യം വഹിച്ചു. ജീത്തു-മോഹന്‍ലാല്‍ കൂട്ടുകെട്ട് ഒന്നിക്കുമ്പോള്‍ പ്രതീക്ഷകള്‍ ഏറെയായിരുന്നു. ആ പ്രതീക്ഷകള്‍ക്ക് കോട്ടം തട്ടിയില്ലെന്നായിരുന്നു ആദ്യ പ്രേക്ഷക പ്രതികരണങ്ങളില്‍ നിന്നും വ്യക്തമായത്. ഇമോഷനല്‍ കോര്‍ട്ട് റൂം ഡ്രാമയായി ചിത്രത്തെ അവതരിപ്പിക്കുന്നതില്‍ ജീത്തു നൂറ് ശതമാനം വിജയിച്ചുവെന്നും പ്രേക്ഷകര്‍ പറയുന്നു.
കോടതിയും വ്യവഹാരവും നിയമയുദ്ധവുമൊക്കെ തികച്ചും റിയലിസ്റ്റിക്കായി അവതരിപ്പിക്കുന്ന ഒരു ലീഗല്‍ ത്രില്ലര്‍ ഡ്രാമ പ്രേക്ഷകരെ ഉദ്വേഗത്തിന്റെ മുള്‍മുനയില്‍ നിര്‍ത്തുന്നു. അതോടൊപ്പം ഈ ചിത്രം ശക്തമായ കുടുംബ ബന്ധങ്ങളിലൂടെയും സഞ്ചരിക്കുന്നുണ്ട്. പ്രിയാമണി, നന്ദു, ദിനേശ് പ്രഭാകര്‍, ശങ്കര്‍ ഇന്ദുചൂഡന്‍, മാത്യു വര്‍ഗീസ്, കലേഷ്, രമാദേവി, കലാഭവന്‍ ജിന്റോ, രശ്മി അനില്‍, ഡോ.പ്രശാന്ത് എന്നിവരും ഈ ചിത്രത്തിലെ പ്രധാന അഭിനേതാക്കളാണ്.
ശാന്തി മായാദേവിയും, ജീത്തു ജോസഫും ചേര്‍ന്നാണ് നേരിന്റെ തിരക്കഥ രചിച്ചിരിക്കുന്നത്. വിനായക് ശശികുമാറിന്റെ വരികള്‍ക്ക് വിഷ്ണു ശ്യാം ഈണം പകര്‍ന്നിരിക്കുന്നു. ഛായാഗ്രഹണം സതീഷ് കുറുപ്പ്. എഡിറ്റിങ് വി.എസ്.വിനായക്. കലാസംവിധാനം ബോബന്‍, കോസ്റ്റ്യൂം ഡിസൈന്‍ -ലിന്റാ ജീത്തു. മേക്കപ്പ് അമല്‍ ചന്ദ്ര. ചീഫ് അസ്സോഷ്യേറ്റ് ഡയറക്ടര്‍ സുധീഷ് രാമചന്ദ്രന്‍. അസ്സോസ്സിയേറ്റ് ഡയറക്ടേര്‍സ് സോണി ജി. സോളമന്‍, എസ്.എ.ഭാസ്‌ക്കരന്‍, അ
മുഴ പഴുത്തു,ലിംഗത്തില്‍ മുറിവ്; തണ്ണീര്‍ക്കൊമ്പന്റെ മരണകാരണം ഹൃദയാഘാതമെന്ന് പോസ്റ്റ്മോര്ട്ടം റിപ്പോര്‍ട്ട്
: മയക്കുവെടിവെച്ച് കര്‍ണാടക വനംവകുപ്പിന് കൈമാറിയ തണ്ണീര്‍ക്കൊമ്പന്റെ മരണകാരണം ഹൃദയാഘാതമെന്ന് പോസ്റ്റ്മോര്ട്ടം റിപ്പോര്‍ട്ട്. ശരീരത്തില്‍ മുഴയുണ്ടായിരുന്നു. അത് പഴുത്തു. ലിംഗത്തില്‍ മുറിവുണ്ടായിരുന്നു. ഞരമ്പില്‍ അമിതമായി കൊഴുപ്പ് അടിഞ്ഞിരുന്നു. സമ്മര്‍ദത്തെത്തുടര്‍ന്നുണ്ടായ ഹൃദയാഘാതമാണ് മരണകാരണമെന്നും പ്രാഥമിക പോസ്റ്റ്മോര്ട്ടം റിപ്പോര്‍ട്ടില്‍ പറയുന്നു.
കാലിലുണ്ടായ മുഴയ്ക്ക് പഴക്കമുണ്ട്. ശ്വാസകോശത്തില്‍ നീര്‍ക്കെട്ടുണ്ടായിരുന്നെന്നും പ്രാഥമിക പോസ്റ്റ്മോര്ട്ടം റിപ്പോര്‍ട്ടില്‍ പറയുന്നു.
വെള്ളിയാഴ്ച മാനന്തവാടിയില്‍ മയക്കുവെടിവെച്ച് പിടികൂടിയ തണ്ണീര്‍ കൊമ്പനെ കര്‍ണാടക വനംവകുപ്പിന് കൈമാറിയ ശേഷമാണ് ശനിയാഴ്ച പുലര്‍ച്ചയോടെ ചരിഞ്ഞത്. രണ്ടാഴ്ച മുമ്പ് കര്‍ണാടകയിലെ ഹാസനില്‍നിന്ന് പിടികൂടി ബന്ദിപ്പുര്‍ വനത്തില്‍ തുറന്നുവിട്ട കാട്ടാനായിരുന്നു ഇത്. 20 ദിവസത്തെ ഇടവേളയ്ക്കിടെ രണ്ടുതവണയാണ് മയക്കുവെടിവെച്ച് പിടികൂടിയത്.
സഹകരണമേഖല വികസനത്തിന്റെ നട്ടെല്ല്; പലര്‍ക്കും അസൂയ, ആര്‍ക്കും തകര്‍ക്കാനാകില്ല- മുഖ്യമന്ത്രി
: കേരളത്തിലെ സഹകരണ മേഖലയെ കള്ളപ്പണത്തിന്റെ കേന്ദ്രമായി പ്രചരിപ്പിക്കാന്‍ ശ്രമിച്ചെന്ന് മുഖ്യമന്ത്രി പിണറായി വിജയന്‍. ഒരു കൂട്ടര്‍ക്കും കള്ളപ്പണം കണ്ടെത്താന്‍ കഴിഞ്ഞില്ല. സഹകരണ മേഖലയെ തകര്‍ക്കാനുള്ള ശ്രമം ഉണ്ടായപ്പോള്‍, സംരക്ഷിക്കാന്‍ സംസ്ഥാന സര്‍ക്കാര്‍ മുന്നോട്ടുവന്നു. നാടിന്റെ വികസനത്തിന്റെ കാര്യത്തില്‍ നട്ടെല്ലായി പ്രവര്‍ത്തിക്കുന്ന ഒന്നാണ് സഹകരണ മേഖല. ഈ വളര്‍ച്ച ചിലരെ വല്ലാതെ അലോസരപ്പെടുത്തുന്നുവെന്നും മുഖ്യമന്ത്രി പറഞ്ഞു. ആനാട് സര്‍വീസ് സഹകരണ ബാങ്കിന്റെ 100-ാം വാര്‍ഷികാഘോഷ ചടങ്ങില്‍ സംസാരിക്കുകയായിരുന്നു മുഖ്യമന്ത്രി.
സംസ്ഥാനത്തെ സഹകരണ മേഖലയില്‍ രണ്ടര ലക്ഷം കോടി രൂപയുടെ നിക്ഷേപം ആര്‍ജ്ജിക്കാനായി. അത് രാജ്യത്ത് പലര്‍ക്കും അസൂയ ഉണ്ടാക്കിയിട്ടുണ്ട്. കേരളത്തില്‍ കേന്ദ്ര ഏജന്‍സികള്‍ വട്ടമിട്ടു പറക്കുകയാണെന്നും ഏത് ഏജന്‍സി വിചാരിച്ചാലും തകര്‍ക്കാന്‍ കഴിയുന്ന ഒന്നല്ല കേരളത്തിലെ സഹകരണ മേഖലയെന്നും അദ്ദേഹം വ്യക്തമാക്കി.
കേരളം സഹകരണ പ്രസ്ഥാനത്തെ നെഞ്ചേറ്റിയ നാടാണ്. ഇവിടെ ജനങ്ങളും പ്രസ്ഥാനങ്ങളും തമ്മില്‍ ഇഴപിരിയാത്ത ബന്ധമാണുള്ളത്. ജനങ്ങളുടെ പ്രശ്‌നങ്ങളില്‍ താങ്ങായി സഹകരണ മേഖല പ്രവര്‍ത്തിക്കുന്നുവെന്നും മുഖ്യമന്ത്രി ചൂണ്ടിക്കാട്ടി. തീര്‍ത്തും ജനാധിപത്യ രീതിയില്‍ പ്രവര്‍ത്തിക്കുന്ന സുശക്തമായ മേഖലയാണ് സഹകരണ മേഖല. ഗ്രാമങ്ങളില്‍ ബാങ്കിങ് രീതി എത്തിച്ചത് സഹകരണ മേഖലയാണ്. ഒരു ലക്ഷത്തി എണ്‍പത്തി ആറായിരം കോടി രൂപയുടെ വായ്പയാണ് സഹകരണ മേഖല മുഖേന നടക്കുന്നത്.
നാടിന്റെ അഭിവൃദ്ധിക്കാണ് സഹകരണ മേഖല പ്രാധാന്യം നല്‍കുന്നത്. സഹകരണ മേഖല പ്രശ്‌നങ്ങള്‍ നേരിട്ട ഘട്ടത്തില്‍ കേരള സര്‍ക്കാര്‍ ഫലപ്രദമായി ആ മേഖലയെ സഹായിക്കാന്‍ വന്നിരുന്നു. നോട്ടുനിരോധന ഘട്ടത്തില്‍ സഹകരണ മേഖലയെ കുറിച്ച് തെറ്റായ ചിത്രം പ്രചരിപ്പിക്കാന്‍ ശ്രമമുണ്ടായി. കള്ളപ്പണത്തിന്റെ കേന്ദ്രമാണെന്ന് പ്രചരിപ്പിക്കാന്‍ ചിലര്‍ ശ്രമിച്ചുവെന്നും മുഖ്യമന്ത്രി കുറ്റപ്പെടുത്തി.
കേരളത്തിലെ സഹകരണ മേഖലയ്ക്ക് കൃത്യമായ ചട്ടവും നിയമങ്ങളുണ്ട്. ഏതെങ്കിലും ഒരു സ്ഥാപനത്തില്‍ സാധാരണഗതികള്‍ക്ക് ക്രമം അല്ലാത്ത പ്രവര്‍ത്തനങ്ങള്‍ നടന്നുവെങ്കില്‍ അത്തരം ഇടപെടലാണ് വകുപ്പിന്റെ ഭാഗത്തുനിന്ന് ഉണ്ടാകുന്നത്. അത് സഹകരണ മേഖലയുടെ വിശ്വാസ്യത കൂടുതല്‍ വര്‍ദ്ധിപ്പിക്കുകയാണ്. മുഖം നോക്കാതെയുള്ള നടപടി ഇത്തരം ക്രമക്കേട് ഉണ്ടായ സ്ഥാപനങ്ങളില്‍ ഉണ്ടായി എന്നുള്ളതാണ് അനുഭവം. സഹകരണ മേഖലയെ ആര് വിചാരിച്ചാലും തകര്‍ക്കാന്‍ കഴിയില്ല. അത്രത്തോളം വിശ്വാസ്യത നേടിയെടുക്കാന്‍ സഹകരണ മേഖലയ്ക്ക് കഴിഞ്ഞിട്ടുണ്ടെന്നും മുഖ്യമന്ത്രി അവകാശപ്പെട്ടു.
‘ഒഴുക്കിനെതിരെ നീന്താനും ആളുകളുണ്ടെന്ന പ്രഖ്യാപനമാണ് അയ്യർ ഇൻ അറേബ്യ’ : കെ ടി ജലീൽ
മുകേഷ്, ഉർവശി, ധ്യാൻ ശ്രീനിവാസൻ തുടങ്ങി പ്രേക്ഷകപ്രിയരായ താരങ്ങൾ അണിനിരന്ന ഏറ്റവും പുതിയ ചിത്രമാണ് അയ്യർ ഇൻ അറേബ്യ. എം എ നിഷാദ് സംവിധാനം നിർവഹിച്ച ചിത്രം കഴിഞ്ഞ ദിവസമാണ് തീയേറ്ററുകളിൽ പ്രദർശനത്തിന് എത്തിയത്. ചിത്രം മികച്ച ഒരു ഫാമിലി കോമഡി എന്റെർറ്റൈനെർ ആണെന്നാണ് പ്രേക്ഷകരുടെ അഭിപ്രായം. അതേസമയം ചിത്രത്തെ കുറിച്ചുള്ള എംഎൽഎ കെ ടി ജലീലിന്റെ ഫേസ്ബുക്ക് പോസ്റ്റ് ആണിപ്പോൾ ശ്രദ്ധ നേടുന്നത്. കാലത്തോട് സംവദിക്കുന്ന ചിത്രമാണ് അയ്യർ ഇൻ അറേബ്യ എന്നാണ് അദ്ദേഹം പോസ്റ്റിൽ പറഞ്ഞിരിക്കുന്നത്.
ഭാരതീയ സംസ്കാരവും അത് ആളുകളിൽ ഉണ്ടാക്കിയ സ്വാധീനവും എല്ലാം കൂടികലർന്നുള്ള ഒരു മികച്ച ആക്ഷേപഹാസ്യ ചിത്രം എന്നാണ് അയ്യർ ഇൻ അറേബ്യയെക്കുറിച്ചു ജലീൽ പറയുന്നത്. കലാരംഗത്ത് പ്രവർത്തിക്കുന്നവർ ഒഴുക്കിനനുകൂലമായി നീന്താൻ തിടുക്കം കൂട്ടുമ്പോൾ ഒഴുക്കിനെതിരെ നീന്താനും കുറച്ചു ആളുകളുണ്ടെന്ന പ്രഖ്യാപനമാണ് ഈ സിനിമ എന്നും, മനുഷ്യ വികാരങ്ങളെ വളച്ചുകെട്ടാതെ നേരെ അവതരിപ്പിക്കുകയാണ് ഈ ചിത്രം എന്നും അദ്ദേഹം അയ്യർ ഇൻ അറേബ്യയെ വിശേഷിപ്പിക്കുന്നുണ്ട്. സിനിമയിൽ അദ്ദേഹത്തെ പിടിച്ചിരുത്തിയ ചില രംഗങ്ങളും അതിലൂടെ സിനിമ വിളിച്ചുപറയാൻ ആഗ്രഹിച്ച രാഷ്ട്രീയവും അദ്ദേഹത്തിന്റെ പോസ്റ്റിൽ നിഴലിക്കുന്നുണ്ട്.
ഫേസ്ബുക്ക് പോസ്റ്റിന്റെ പൂർണ്ണ രൂപം …
“അയ്യർ ഇൻ അറേബ്യ”: കാലത്തോട് സംവദിക്കുന്ന ചലചിത്രം. വർത്തമാനത്തിൻ്റെ അരുതായ്മകളോടും തെറ്റായ ധാരണകളോടും കലഹിക്കുവാൻ സിനിമയോളം നല്ല ഒരു മാധ്യമം ഉണ്ടോ എന്ന് സംശയമാണ്. 2014 ന് ശേഷം പൊതുവെ ഇന്ത്യയിൽ സ്വസംസ്കാരാഭിമാന ബോധം അതിര് വിടുന്നത് ഒരു യാഥാർത്ഥ്യമാണ്. അതേതുടർന്ന് ഭാരതീയ ദർശനങ്ങളുടെ മൃദുത്വവും കാർക്കശ്യതയില്ലായ്മയും പതിയെപ്പതിയെ അപ്രത്യക്ഷമായി. മൂഢമായ അന്ധവിശ്വാസങ്ങൾ വിദ്യാസമ്പന്നരെപ്പോലും സ്വാധീനിച്ചു. അയൽപക്ക ബന്ധങ്ങളിൽ ഒരുതരം അകൽച്ച പ്രതിഫലിക്കാൻ തുടങ്ങി. “മതം” നായകസ്ഥാനത്തു നിന്ന് വില്ലൻ വേഷത്തിലേക്ക് വഴിമാറി. കേരളത്തിൽ പൊതുവെ ഇത്തരം ധാരണകൾക്ക് പ്രചാരം ലഭിച്ചില്ലെങ്കിലും സവർണ്ണബോധം വേരറ്റുപോകാത്ത ദേശങ്ങളിൽ സാമൂഹ്യബന്ധങ്ങളിൽ കാതലായ മാറ്റം പ്രകടമായത് വിഷമത്തോടെയെങ്കിലും നമ്മൾ അറിഞ്ഞു.
ഗോമൂത്രത്തിനും ചാണകമിഠായിക്കും വ്യാപകമായല്ലെങ്കിലും മലയാളികൾക്കിടയിലും പ്രിയമേറി. പാലിന് പശുവിനെ വളർത്തുന്ന ക്ഷീരകർഷക പാരമ്പര്യത്തിൽ നിന്ന് ആരാധനാമൂർത്തിയെ പരിപാലിക്കുന്ന തലത്തിലേക്ക് കാര്യങ്ങൾ ചെന്നെത്തി. ഭാരതീയമല്ലാത്തതൊന്നും സ്വീകാര്യമല്ലെന്ന ബോധം കുത്തിവെക്കാൻ സംഘടിത നീക്കങ്ങളാണ് രാജ്യമൊട്ടുക്കും നടക്കുന്നത്. സഹോദര നാഗരികതകളും സംസ്കാരങ്ങളും അധമമാണെന്ന ചിന്ത സമൂഹത്തിൽ ധ്രുതഗതിയിലാണ് പ്രചാരം നേടുന്നത്. ഉപജീവനം തേടി കടൽകടന്ന് പോകുന്നത് പോലും ഉത്തമമല്ലെന്ന ശങ്ക പല ശുദ്ധാത്മാക്കളിലും നാമ്പിട്ടു. അറബി ഭാഷയും ഗൾഫുനാടുകളും ചിലർക്കെങ്കിലും അലർജിയായി. രാജ്യത്ത് വളരുന്ന പ്രതിലോമ പ്രവണതകളെ രൂക്ഷമായ പരിഹാസത്തിലൂടെ കേരളീയ പശ്ചാതലത്തിൽ അവതരിപ്പിക്കുന്ന കലാസൃഷ്ടിയാണ് “അയ്യർ ഇൻ അറേബ്യ”.
കലാരംഗത്ത് പ്രവർത്തിക്കുന്നവർ ഒഴുക്കിനനുകൂലമായി നീന്താൻ തിടുക്കം കൂട്ടുമ്പോൾ ഒഴുക്കിനെതിരെ നീന്താനും ആളുകളുണ്ടെന്ന പ്രഖ്യാപനമാണ് ഈ സിനിമ. മനുഷ്യ വികാരങ്ങളെ വളച്ചുകെട്ടാതെ ഋജുവായി അവതരിപ്പിക്കുകയാണ് “അയ്യർ ഇൻ അറേബ്യ” എന്ന ചലചിത്രം. പട്ടണങ്ങളിലെ ഫ്ലാറ്റു സമുച്ഛയങ്ങൾ പണ്ടൊക്കെ ബഹുസ്വരമായിരുന്നു. എന്നാൽ ആ പതിവിന് വിഘ്നം സംഭവിച്ചിരിക്കുന്നു. നാനാത്വം ഉൽഘോഷിക്കാൻ പേരിനാരെങ്കിലും ഉണ്ടായാലായി. അത്തരമൊരു ജീവിത ചുറ്റുപാടിൽ “അയ്യരെന്ന” വാലിൽ അഭിരമിച്ച് ജീവിക്കുന്ന കുടുംബനാഥനെ ചുറ്റിപ്പറ്റിയാണ് കഥ പുരോഗമിക്കുന്നത്. ശ്രീനിവാസ അയ്യരുടെ ഭാര്യ ഝാൻസിറാണി ശരിയായ ബോധ്യങ്ങളുള്ള ചരിത്രാദ്ധ്യാപികയാണ്. തിരുത്തപ്പെടുന്ന ചരിത്രമല്ല യഥാർത്ഥ ചരിത്രമെന്നാണ് അവരുടെ ഉറച്ച വിശ്വാസം. വികലമായ ചരിത്രം അവതരിപ്പിച്ച് അറിവുള്ളവരുടെ സിരകളിൽ പോലും വർഗ്ഗീയ വിഷം കുത്തിവെക്കാൻ “പ്രമുഖ്”മാർ ശ്രമിക്കുമ്പോൾ അതിനെ വസ്തുതകൾ നിരത്തി ടീച്ചറായ അയ്യരുടെ ഭാര്യ പൊളിച്ചടുക്കുന്നത് പുതിയ കാലത്ത് ഏറെ പ്രസക്തമാണ്.
അവിടെയെത്തിയ അയ്യർ ജീവിതത്തിലാദ്യമായി ദേശവും ഭാഷയും സംസ്കാരവും വിശ്വാസവും നിലനിർത്തിക്കൊണ്ടുതന്നെ ബഹുസ്വരമായി ജീവിക്കുന്ന സമൂഹത്തെ കണ്ട് അൽഭുതംകൂറി. ദുബായിയിലെ യാത്രക്കിടെ അയ്യർ തൻ്റെ സ്നേഹിതനുമൊത്ത് ഭക്ഷണം കഴിക്കാൻ കയറിയത് ഒരു പാക്കിസ്ഥാനി റസ്റ്റോറൻ്റിൽ. ”പച്ചകളുടെ” ഹോട്ടലിൽ നിന്ന് ഭക്ഷണം കഴിക്കാതെ ഇറങ്ങിപ്പോരാനുള്ള അയ്യരുടെ ശ്രമം ‘അടുത്തൊന്നും വേറെ ഹോട്ടലില്ലെന്ന്’ പറഞ്ഞ് സുഹൃത്ത് തടഞ്ഞു. അങ്ങിനെ ആദ്യമായി ശ്രീനിവാസ അയ്യർ ഭാരതീയ സംസ്കാരത്തിൻ്റെ “കൺകണ്ട” ശത്രുക്കളുടെ ഭോജനശാലയിൽ നിന്ന് ഭക്ഷണം കഴിച്ചു. കറാച്ചി ദർബാറിൽ സപ്ലയറെ കണ്ടപ്പോഴാണ് അയ്യർ ശരിക്കും ഞെട്ടിയത്. നാട്ടിലെ റസിഡൻ്റ് അസോസിയേഷൻ്റെ ‘ധർമ്മോപദേശ ക്ലാസിൽ’ ഭാരതീയ സംസ്കാരത്തിൻ്റെ മഹത്വം പഠിപ്പിച്ച അതേ ”പ്രമുഖ്” വെയിറ്ററുടെ വേഷത്തിൽ തൻ്റെ മുന്നിൽ നിൽക്കുന്നു! കുടുംബം പോറ്റാൻ മറ്റു വഴികളില്ലാത്തത് കൊണ്ട് നാടുവിടേണ്ടി വന്നതാണെന്ന് അദ്ദേഹം സങ്കോചമില്ലാതെ പറയുമ്പോൾ ഗൾഫ് നാടുകളിൽ ജോലി ചെയ്യുകയും ബിസിനസ് നടത്തുകയും ചെയ്യുന്ന “സംഘി”കളുടെ ശിരസ്സ് കുനിയുമെന്നുറപ്പ്.
സൈറയെ പ്രണയത്തിൽ നിന്ന് പിന്തിരിപ്പിക്കാൻ അയ്യരും സുഹൃത്തും സുബൈർ ഹാജിയുടെ സഹായം തേടി. ഇരുഭാഗത്തും സമ്മർദ്ദം മുറുകി. അന്യമതക്കാരന് മകളെ കെട്ടിച്ച് കൊടുത്താലുണ്ടാകുന്ന ഭവിഷ്യത്ത് സുബൈർ ഹാജിയെ പറഞ്ഞ് മനസ്സിലാക്കാൻ മുസ്ലിങ്ങളിലെ “മതപരിവർത്തന പ്രോൽസാഹന കമ്മിറ്റി”ക്കാരും എത്തി. അവരുടെ കള്ളക്കളി പൊളിച്ച ഫൈസലിനെ അവർ ഫ്ലാറ്റിൽ നിന്ന് ഇറക്കിവിട്ടു. അയ്യരുടെ ഭാര്യ ഝാൻസിക്ക് സൈറയെ നന്നേ ബോധിച്ചു. തൻ്റെ മകനെ പിഴപ്പിച്ചത് ഫ്രെഡിയും സുഹൃത്തുക്കളുമാണെന്ന ധാരണയിൽ ശ്രീനിവാസ അയ്യർ ഫ്രെഡിയുടെ സ്ഥാപനത്തിൽ ചെന്ന് അയാളെ കണക്കിന് ശകാരിച്ചു. ഇതറിഞ്ഞ രാഹുൽ അച്ഛനുമായി വഴക്കിടുന്നു. പൂണൂലിൻ്റെ ഗരിമ പറഞ്ഞ അച്ഛനോട് അതെന്നേ താൻ ഉപേക്ഷിച്ച വിവരം ഷർട്ടുയർത്തി രാഹുൽ വെളിപെടുത്തിയത് അയ്യരെ ശരിക്കും തളർത്തി. സന്ദർഭത്തിൻ്റെ ഗൗരവം മനസ്സിലാക്കി ഝാൻസി, അമ്മയിൽ നിന്ന് പെട്ടന്ന് ഒരു യഥാർത്ഥ ഭാര്യയായി. അച്ഛനോട് പറയാൻ പാടില്ലാത്തത് പറഞ്ഞുവെന്ന മട്ടിൽ ടീച്ചർ മകനെ അടിച്ചു. ഭാര്യാ-ഭർതൃ ബന്ധത്തിൻ്റെ രസതന്ത്രം മുഴുവൻ പ്രതിഫലിച്ച രംഗമാണത്.
അമ്മയുടെ അടി രാഹുലിൻ്റെ മുഖത്തല്ല, ഹൃദയത്തിലാണ് കൊണ്ടത്. സങ്കടം അണപൊട്ടിയ വികാരത്തിൽ അവൻ കാറെടുത്ത് മരുഭൂമിയിലേക്ക് വിട്ടു. വഴിയറിയാതെ മണൽക്കാട്ടിൽ അവൻ ഒറ്റപ്പെട്ടു. പിന്നീട് സംഭവിച്ചത് ശ്വാസം അടക്കിപ്പിടിച്ചേ കാണാനാകൂ. മനുഷ്യരുടെ മതാതീതമായ സൗഹൃദവും പച്ചയായ ജീവിത യാഥാർത്ഥ്യങ്ങളും അയ്യരെ ഏകശിലാ സംസ്കാരത്തിൻ്റെ തടവറയിൽ നിന്ന് മോചിതനാക്കി. ശ്രീനിവാസ അയ്യർ, നടപ്പിലും ഇരിപ്പിലും വസ്ത്രധാരണത്തിലുമെല്ലാം നനാത്വത്തെ പുൽകിയ ഒരു സാമൂഹ്യ ജീവിയാകുന്നതോടെ “അയ്യർ ഇൻ അറേബ്യ” അവസാനിക്കുന്നു.
എം.എ നിഷാദിൻ്റെ കഥയിലും തിരക്കഥയിലും സംവിധാനത്തിലും അണിഞ്ഞൊരുങ്ങിയ സിനിമ, കഥയുടെ സവിശേഷത കൊണ്ടുമാത്രമല്ല, ദൃശ്യഭംഗികൊണ്ടും ശ്രദ്ധേയമായി. ശാന്തമായ ഒരു പുഴയുടെ ഒഴുക്കുപോലെ ചിരിപ്പിച്ചും ചിന്തിപ്പിച്ചുമാണ് “അയ്യർ ഇൻ അറേബ്യ” അഭ്രപാളിയിൽ മുന്നേറുന്നത്. പാട്ടുകളും നൃത്തച്ചുവടുകളും ആകർഷണീയമാണ്. മുകേഷ് എന്ന നടൻ്റെ അഭിനയ മികവ് പൂർണ്ണമായും ഉപയോഗപ്പെടുത്താൻ സംവിധായകന് സാധിച്ചു. ഊർവശി പതിവുപോലെ പ്രകടനം ഗംഭീരമാക്കി. ധ്യാൻശ്രീനിവാസനും ഷൈൻടോമും അലൻസിയറും സുധീർ കരമനയും ജാഫർ ഇടുക്കിയും ബിജു സോപാനവും സുനിൽ സുഗതനും അവരവരുടെ വേഷങ്ങൾ മികവുറ്റതാക്കി. കുടുംബസമേതം മലയാളികൾ കാണേണ്ട ഒരു നല്ല സിനിമ. കുടുസ്സായ മനസ്സുകളെ വിശാലമാക്കാൻ ഉപകരിക്കുന്ന മികച്ചൊരു ചലചിത്രം.”
