യു.കെ. പൊതുതിരഞ്ഞെടുപ്പില് ശ്രദ്ധേയമായത് മലയാളിയുടെ വിജയം. യുകെയില് ഇത്തരമൊരു സ്ഥാനം വഹിക്കുന്ന മലയാളിയാണ് ഇദ്ദേഹം. ലേബര് പാര്ട്ടിയുടെ സ്ഥാനാര്ഥിയും കോട്ടയം ഓണംതുരുത്ത് സ്വദേശിയുമായ സോജന് ജോസഫാണ് കണ്സര്വേറ്റീവ് പാര്ട്ടിയുടെ കുത്തക സീറ്റ് പിടിച്ചെടുത്തുകൊണ്ട് തിരഞ്ഞെടുപ്പിലെ താരമായിരിക്കുന്നത്. ഇംഗ്ലണ്ടിന്റെ പൂന്തോട്ടം എന്നറിയപ്പെടുന്ന കെന്റ് കൗണ്ടിയിലുള്ള ആഷ്ഫഡ് മണ്ഡലത്തില് നിന്നാണ് സോജന് ജോസഫ് വിജയിച്ചത്.
കണ്സര്വേറ്റീവ് പാര്ട്ടിയുടെ സ്ഥാനാര്ഥി ഡാമിയന് ഗ്രീനിനെ 1779 വോട്ടിനാണ് സോജന് പരാജയപ്പെടുത്തിയത്. സോജന് ജോസഫിന് 15,262 വോട്ടുകള് (32.5 ശതമാനം) ലഭിച്ചപ്പോള് ഡാമിയന് ഗ്രീനിന് 13,484 വോട്ടുകള് (28.7 ശതമാനം) മാത്രമേ കിട്ടിയുള്ളൂ. റിഫോം യു.കെയുടെ ട്രിസ്ട്രാം കെന്നഡി ഹാര്പ്പര് പതിനായിരത്തിലേറെ വോട്ടുപിടിച്ചതാണ് സോജന്റെ വിജയത്തില് നിര്ണായകമായത്.
ലേബര് പാര്ട്ടിയുടെ സാമൂഹിക പ്രവര്ത്തനങ്ങളിലൂടെയാണ് സോജന് ജോസഫ് ശ്രദ്ധേയനാകുന്നത്. 2002 മുതല് പൊതുരംഗത്ത് പ്രവര്ത്തിക്കുന്ന സോജന് മികച്ച അനുഭവസമ്പത്തുണ്ട്. പതിറ്റാണ്ടുകളായി കണ്സര്വേറ്റീവ് പാര്ട്ടിയുടെ കുത്തക മണ്ഡലമായിരുന്ന ആഷ്ഫഡില് അട്ടിമറി വിജയം നേടിയ സോജന് തെരേസ മേയ് മന്ത്രിസഭയില് മന്ത്രിയും ഒരുവേള ഡെപ്യൂട്ടി പ്രധാനമന്ത്രിയുടെ ചുമതലയും വഹിച്ച മുതിര്ന്ന ടോറി നേതാവ് ഡാമിയന് ഗ്രീനിനെയാണ് തോല്പ്പിച്ചത്. 1997 മുതല് തുടര്ച്ചയായി ഇവിടെനിന്നും വിജയിക്കുന്ന ഡാമിയന് ഗ്രീന് കഴിഞ്ഞ തിരഞ്ഞെടുപ്പില് 13,000 വോട്ടായിരുന്നു ഭൂരിപക്ഷം. പ്രീപോള് സര്വേകള് നേരത്തേ സോജന്റെ വിജയം പ്രവചിച്ചിരുന്നു.
കൈപ്പുഴ ചാമക്കാലായില് ജോസഫിന്റെയും പരേതയായ ഏലിക്കുട്ടിയുടെയും മകനാണ് സോജന്. ഭാര്യ ബ്രൈറ്റ ജോസഫ്. വിദ്യാര്ഥികളായ ഹാന്ന, സാറ, മാത്യു എന്നിവര് മക്കളാണ്. കെന്റ് ആന്ഡ് മെഡ്വേ എന്.എച്ച്.എസ്. ആന്ഡ് സോഷ്യല് കെയര് പാര്ട്നര്ഷിപ്പ് ട്രസ്റ്റില് മാനസികാരോഗ്യവിഭാഗം നഴ്സിങ് മേധാവിയാണ് സോജന് ജോസഫ്.
തിരൂരില് നിന്ന് വ്യാഴാഴ്ച കാണാതായ 17കാരനെ കണ്ടെത്താനായില്ല
മലപ്പുറം തിരൂരില് നിന്ന് വ്യാഴാഴ്ച കാണാതായ 17 വയസുകാരനെ ഇനിയും കണ്ടെത്താനായില്ല. അബ്ദുല് ജലീലിന്റെ മകന് ഡാനിഷ് മുഹമ്മദിനെയാണ് കാണാതായത്. വ്യാഴാഴ്ച രാവിലെ യൂണിഫോം ധരിച്ച് സ്കൂളിലേക്ക് പുറപ്പെട്ട കുട്ടിയെ പിന്നീട് കാണാനില്ലാതെ വരികയായിരുന്നു.
രാവിലെ 7 മണിക്ക് വീട്ടില് നിന്നിറങ്ങിയ കുട്ടിയെ 8 മണിയോടെ ചിലര് താനൂര് ടൗണില് വച്ച് കണ്ടിരുന്നു. കുടുംബം പൊലീസില് പരാതി നല്കിയെങ്കിലും കുട്ടിയെ ഇതുവരെ കണ്ടെത്താന് സാധിച്ചിട്ടില്ല. വീട്ടില് നില്ക്കാനോ പഠിക്കാനോ തനിക്ക് കഴിയുന്നില്ലെന്നും മുബൈയില് പോയി ജോലി ചെയ്ത് ജീവിക്കാന് ആഗ്രഹിക്കുന്നതായും ഡാനിഷ് ഒരു കൂട്ടുകാരനോട് പറഞ്ഞതായി വിവരം ലഭിച്ചിട്ടുണ്ട്.
തിരൂരില് നിന്നും മുംബൈയിലേക്ക് സ്പെഷ്യല് ട്രെയിന് സര്വീസ് ഉള്പ്പെടെയുള്ളതിനാല് റെയില്വേ സ്റ്റേഷനിലെ സിസിടിവി കേന്ദ്രീകരിച്ചും പൊലീസ് അന്വേഷണം നടത്തുന്നുണ്ട്. കുട്ടിയെക്കുറിച്ച് എന്തെങ്കിലും വിവരം ലഭിച്ചാല് തിരൂര് പൊലീസ് സ്റ്റേഷനില് വിവരമറിയിക്കണമെന്ന് പൊലീസ് പറഞ്ഞു.
ഒറ്റപ്പെട്ട സംഭവങ്ങളുടെ പേരില് പരീക്ഷ പൂര്ണമായും റദ്ദാക്കാനാകില്ല; നീറ്റ് വിവാദത്തില് സത്യവാങ്മൂലവുമായി എന്ടിഎ
നീറ്റ് പരീക്ഷയുമായി ബന്ധപ്പെട്ട വിഷയത്തില് സത്യവാങ്മൂലവുമായി നാഷണല് ടെസ്റ്റിം?ഗ് ഏജന്സി. പട്നയിലും ?ഗോധ്രയിലും മാത്രമാണ് ക്രമക്കേട് നടന്നതെന്നും ഒറ്റപ്പെട്ട പ്രശ്നങ്ങളുടെ പേരില് പരീക്ഷ പൂര്ണമായും റദ്ദാക്കാനാകില്ലെന്നുമാണ് സത്യവാങ്മൂലത്തില് പറയുന്നത്. ഗോദ്രയില് ഡെപ്യൂട്ടി സൂപ്രണ്ട് തുഷാര് ഭട്ടി സഹായത്തോടെയാണ് ക്രമക്കേട് നടന്നത്.
രാജ്യത്ത് മറ്റിടങ്ങളില് ഉയര്ന്ന ആരോപണങ്ങള് ആള്മാറാട്ടങ്ങളെക്കുറിച്ചാണ്. സുതാര്യത ഉറപ്പാക്കി തന്നെയാണ് പരീക്ഷ നടത്തിയിട്ടുള്ളത്. സംഭവത്തില് സിബിഐ അന്വേഷണം നടത്തുകയാണെന്നും എന്ടിഎ അറിയിച്ചു. ജനുവരി എട്ടിന് നീറ്റുമായി ബന്ധപ്പെട്ട കേസുകള് സുപ്രിംകോടതി ഒരുമിച്ചു പരിഗണിക്കുന്ന സാഹചര്യത്തിലാണ് എന്ടിഎ സത്യവാങ്മൂലം സമര്പ്പിച്ചിരിക്കുന്നത്.
പരീക്ഷ റദ്ദാക്കില്ലെന്ന നിലപാട് തന്നെയാണ് ഇന്നലെ കേന്ദ്രസര്ക്കാരും സുപ്രിംകോടതിയെ അറിയിച്ചത്. നീറ്റ് പരീക്ഷ റദ്ദാക്കുന്നത് യുക്തിസഹമല്ലെന്ന്, നീറ്റ് പരീക്ഷ റദ്ദാക്കണമെന്ന ഹര്ജിയില് സുപ്രീം കോടതിയില് സമര്പ്പിച്ച സത്യവാങ്മൂലത്തില് കേന്ദ്രം അറിയിച്ചു. പരീക്ഷ റദ്ദാക്കുന്നത് ലക്ഷക്കണക്കിന് പേരെ ബാധിക്കുമെന്നും, ചോദ്യപേപ്പര് ചോര്ച്ചയില് സിബിഐ അന്വേഷണം പുരോഗമിക്കുകയാണെന്നും കേന്ദ്ര സര്ക്കാര് സത്യവാങ്മൂലത്തില് വ്യക്തമാക്കി.
അതേസമയം നീറ്റ് പി ജി പരീക്ഷയുടെ പുതിയ തീയതി പ്രഖ്യാപിച്ചു. ഓഗസ്റ്റ് 11ന് രണ്ടു ഷിഫ്റ്റുകളിലായി പരീക്ഷ നടക്കും. ചോദ്യ പേപ്പര് ചോര്ച്ച വിവാദത്തെ തുടര്ന്ന് മാറ്റി വച്ച പരീക്ഷകളുടെ തിയ്യതിയാണ് നാഷണല് ബോര്ഡ് ഓഫ് എക്സാമിനേഷന്സ് ഇന് മെഡിക്കല് സയന്സസ് പുനര് നിശ്ചയിച്ചത്.
നേരത്തെ ജൂണ് 23 ന് നിശ്ചയിച്ച പരീക്ഷകള് മാറ്റി വക്കുന്നതായി ജൂണ് 22നാണ് കേന്ദ്ര ആരോഗ്യ മന്ത്രാലയം അറിയിച്ചത്. ഓഗസ്റ്റ് 11 ന് രണ്ട് ഷിഫ്റ്റുകളായി പരീക്ഷ നടത്തുമെന്ന് നാഷണല് ബോര്ഡ് ഓഫ് എക്സാമിനേഷന്സ് ഇന് മെഡിക്കല് സയന്സസ് അറിയിച്ചു. വ്യക്തമായ കാരണം ഇല്ലാതെ നീറ്റ് പിജി പരീക്ഷ മാറ്റിവെച്ചത് വിവാദമായിരുന്നു.
