കോഴിക്കോട്: കോഴിക്കോട് കോടഞ്ചേരിയില്‍ വാഹനാപകടത്തില്‍ പരിക്കേറ്റ് ആശുപത്രിയിലെത്തിച്ച രോ?ഗി ഡോക്ടറെ ആക്രമിച്ച സംഭവത്തില്‍ പ്രതികരണവുമായി മര്‍ദനമേറ്റ ഡോക്ടര്‍ സുസ്മിത്ത്. തനിക്ക് പുറമെ മറ്റൊരു വനിതാ ഡോക്ടറോടും രോഗി മോശമായി പെരുമാറിയെന്ന് ഡോക്ടര്‍ സുസ്മിത്ത് പറഞ്ഞു.
കല്ലെടുത്ത് തലയ്ക്ക് അടിക്കാന്‍ നോക്കിയപ്പോള്‍ ആണ് സ്വയരക്ഷാര്‍ത്ഥം പിടിച്ചു തള്ളിയതെന്നും മര്‍ദനത്തിന് പുറമേ, കുടുംബത്തെ കത്തിച്ചു കളയും എന്ന് ഭീഷണിപ്പെടുത്തിയതായും ഡോക്ടര്‍ വെളിപ്പെടുത്തി. ഡോക്ടര്‍മാരുടെയും ആശുപത്രി ജീവനക്കാരുടെയും ജീവിതം കടന്നുപോകുന്നത് അപകട സാഹചര്യത്തിലൂടെയാണ്. ഇത്തരം തെറ്റായ പ്രവണതയ്‌ക്കെതിരെ നിയമ നടപടിയുമായി മുന്നോട്ടുപോകുമെന്നും ഡോക്ടര്‍ സുസ്മിത്ത് പറഞ്ഞു.
കോടഞ്ചേരിയിലെ സ്വകാര്യ ആശുപത്രിയില്‍ ഇന്നലെ രാത്രി 12 മണിയോടെയാണ് സംഭവം നടന്നത്. സംഭവത്തിന്റെ വീഡിയോ ദൃശ്യങ്ങള്‍ പുറത്തുവന്നിട്ടുണ്ട്. രോ?ഗി ഡോക്ടറെ അസഭ്യം പറയുന്നതും പിന്നീട് കയ്യേറ്റം ചെയ്യുന്നതും വീഡിയോയില്‍ കാണാം. അപകടത്തില്‍ പരിക്കേറ്റെത്തിയ ഇയാള്‍ക്ക് പ്രാഥമിക ചികിത്സ നല്‍കി പറഞ്ഞയച്ചിരുന്നു.
എന്നാല്‍ മതിയായ ചികിത്സ നല്‍കിയില്ലെന്ന് പറഞ്ഞ് തിരികെയെത്തി ഡോക്ടറെ അസഭ്യം വിളിക്കുകയായിരുന്നു. തുടര്‍ന്ന് ആശുപത്രി ജീവനക്കാര്‍ ചേര്‍ന്ന് ഇയാളെ പുറത്താക്കി. പുറത്ത് പതുങ്ങിയിരുന്ന ഇയാള്‍ പിന്നീട് ഡോക്ടര്‍ പുറത്തുവന്നപ്പോള്‍ അദ്ദേഹത്തിന് നേരെ കല്ലുകൊണ്ട് ആക്രമണത്തിന് മുതിരുകയായിരുന്നു. പ്രതി മദ്യലഹരിയിലായിരുന്നു എന്നാണ് സൂചന. സംഭവത്തില്‍ കോടഞ്ചേരി പൊലീസ് അന്വേഷണമാരംഭിച്ചിട്ടുണ്ട്.
മഴ മുന്നറിയിപ്പില്‍ മാറ്റം; തിരുവനന്തപുരത്ത് ശക്തമായ മഴ, ആറ് ജില്ലകളില്‍ യെല്ലോ അലര്‍ട്ട്
സംസ്ഥാനത്ത് മഴ മുന്നറിയിപ്പില്‍ മാറ്റം. ഇന്നലെ മുതല്‍ തന്നെ സംസ്ഥാനത്ത് വ്യാപകമായി വേനല്‍ മഴ ലഭിച്ചിരുന്നു. ഇന്നും പരക്കെ മഴ ലഭിക്കുമെന്ന് മുന്നറിയിപ്പുണ്ടായിരുന്നു. എന്നാലിപ്പോള്‍ ആറ് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിരിക്കുകയാണ്.
ഉച്ച തിരിഞ്ഞാണ് മഴ മുന്നറിയിപ്പില്‍ മാറ്റം വന്നത്. തെക്കന്‍ കേരളത്തില്‍ തിരുവനന്തപുരം, കൊല്ലം, പത്തനംതിട്ട ജില്ലകളിലും മധ്യകേരളത്തില്‍ എറണാകുളം ജില്ലയിലും വടക്കന്‍ കേരളത്തില്‍ വയനാട്, കണ്ണൂര്‍ ജില്ലകളിലും ആണ് യെല്ലോ അലര്‍ട്ട് പ്രഖ്യാപിച്ചിരിക്കുന്നത്. ഈ ജില്ലകളിലെല്ലാം തന്നെ ഉച്ചയ്ക്ക് ശേഷം കനത്ത മഴ ലഭിക്കുന്നുണ്ട്.
തിരുവനന്തപുരത്ത് നഗരത്തിലും മലയോര മേഖലകളിലും കനത്ത മഴയാണ് ലഭിക്കുന്നത്. നെയ്യാറ്റിന്‍കര, കാരക്കോണം, വെള്ളറട ഭാഗങ്ങളിലാണ് ഏറ്റവുമധികം മഴ ലഭിച്ചത്. അടുത്ത ദിവസങ്ങളിലും വ്യാപകമായി സംസ്ഥാനത്ത് വേനല്‍ മഴ ലഭിക്കുമെന്നാണ് അറിയിപ്പ്. ഇടുക്കിയിലും പത്തനംതിട്ടയിലുമാണ് നിലവിലെ റിപ്പോര്‍ട്ട് പ്രകാരം നാളെ (130524) യെല്ലോ അലര്‍ട്ട് പ്രഖ്യാപിച്ചിരിക്കുന്നത്.
മലപ്പുറത്ത് പ്ലസ് വണ്‍ സീറ്റില്‍ മുന്നറിയിപ്പുമായി ലീഗ്; ബാച്ചുകള്‍ കൂട്ടിയില്ലെങ്കില്‍ സമരം
പ്ലസ് വണ്‍ സീറ്റ് പ്രതിസന്ധി പരിഹരിച്ചില്ലെങ്കില്‍ മുസ്ലീം ലീഗിന്റെ നേതൃത്വത്തില്‍ മലപ്പുറത്ത് സമരമെന്ന സൂചന നല്‍കി പാണക്കാട് സാദിഖലി ശിഹാബ് തങ്ങള്‍. അധിക ബാച്ചുകള്‍ അനുവദിക്കുക എന്ന ആവശ്യം തന്നെയാണ് ഇവര്‍ മുന്നില്‍ വയ്ക്കുന്നത്.
വിജയശതമാനത്തിന് അനുസരിച്ച് കുട്ടികള്‍ക്ക് ഉപരിപഠനത്തിന് സാധ്യത ഒരുങ്ങുന്നില്ല, അതിന് ബാച്ചുകള്‍ അനുവദിക്കുകയെന്നത് തന്നെയാണ് പരിഹാരം, യുഡിഎഫ് ഭരിച്ചിരുന്നപ്പോള്‍ ബാച്ചുകള്‍ അനുവദിച്ചിരുന്നു, ഇപ്പോള്‍ സര്‍ക്കാര്‍ സത്വരമായി ഇടപെട്ടുകൊണ്ട് പരിഹാരം കാണണം, ബാച്ചുകള്‍ അനുവദിക്കുക എന്നത് മുന്‍നിര്‍ത്തിക്കൊണ്ട് തന്നെ എംഎസ്എഫും യൂത്ത് ലീഗും സമരരംഗത്തുണ്ട്, സര്‍ക്കാര്‍ അത് കണ്ടറിഞ്ഞ് ബാച്ച് അനുവദിച്ചുകൊണ്ട് ഈ പ്രതിസന്ധിയില്‍ നിന്ന് കുട്ടികളെ രക്ഷപ്പെടുത്തണം- പാണക്കാട് സാദിഖലി ശിഹാബ് തങ്ങള്‍ പറഞ്ഞു.
പ്ലസ് വണ്‍ പ്രവേശനത്തിന് അധിക ബാച്ചുകള്‍ അനുവദിക്കാത്തത് മലപ്പുറത്ത് കടുത്ത രോഷമാണുണ്ടാക്കുന്നത്. ബാച്ച് കൂട്ടാതെ സീറ്റ് മാത്രം വര്‍ധിപ്പിക്കുന്നത് തിരിച്ചടിയാകുമെന്നും കണക്കുകൂട്ടലുണ്ട്.
‘ഒരാളും പറയാന്‍ പാടില്ലാത്തത്, മാപ്പ് പറഞ്ഞ സ്ഥിതിക്ക് വിവാദത്തിന് പ്രസക്തിയില്ല’; ഹരിഹരനെ തള്ളി കെകെ രമ
മുതിര്‍ന്ന ആര്‍എംപി നേതാവ് കെഎസ് ഹരിഹരന്റെ സ്ത്രീ വിരുദ്ധ പരാമര്‍ശങ്ങള്‍ തള്ളിക്കളഞ്ഞ് വടകര എംഎല്‍എയും ആര്‍എംപി നേതാവുമായ കെകെ രമ. ഹരിഹരന്റെ പരാമര്‍ശങ്ങള്‍ എംഎല്‍എ എന്ന നിലയ്ക്കും വ്യക്തി എന്ന നിലയിലും ഈ പരാമര്‍ശം പൂര്‍ണമായി തള്ളിക്കളയുകയാണെന്ന് രമ വ്യക്തമാക്കി.
കെകെ രമയെ വേദിയില്‍ നിര്‍ത്തിയായിരുന്നു നേരത്തെ കെഎസ് ഹരിഹരന് വിവാദ പരാമര്‍ശം നടത്തിയത്. എന്നാല്‍ വിഷയത്തില്‍ ഹരിഹരനെ കൈവിടുന്ന നിലപാടാണ് രമ സ്വീകരിച്ചത്. ഇത്തരത്തിലുള്ള പരാമര്‍ശങ്ങളോ ഒരു വാക്കോ സ്ത്രീക്കെതിരെ ആരുടെയും ഭാഗത്തുനിന്ന് ഉണ്ടാകാന്‍ പാടില്ലാത്തതാണ്. നമ്മള്‍ നിരന്തരം ചര്‍ച്ച ചെയ്യുന്നതാണ് അത്. എങ്കിലും പലരും ഇത്തരം പരാമര്‍ശങ്ങള്‍ നടത്തുന്നതായി നമ്മള്‍ കാണുന്നുവെന്നും അവര്‍ ചൂണ്ടിക്കാട്ടി.
ഇത്രയും പുരോഗമനത്തിലേക്ക് നീങ്ങുമ്പോഴും ഇത്തരം പരാമര്‍ശങ്ങള്‍ വലിയ വേദനയാണ്. പ്രസംഗ മധ്യേയാണ് മോശമായ പരാമര്‍ശമുണ്ടായത്. ഇതിനെ പൂര്‍ണമായും തള്ളിക്കളയുകയാണെന്നും രമ പറയുകയുണ്ടായി. തെറ്റ് മനസിലാക്കി ഹരിഹരന് മാപ്പുപറഞ്ഞ സ്ഥിതിക്ക് വിവാദത്തിന് പ്രസക്തിയില്ലെന്നും രമ പറഞ്ഞു.
ഹരിഹരന്റെ പരാമര്‍ശത്തിനെതിരെ നിയമ നടപടി സ്വീകരിക്കും എന്നാണ് സിപിഎം ഉള്‍പ്പെടെ അറിയിച്ചിരിക്കുന്നത്. വിവിധ കോണുകളില്‍ നിന്ന് ഇതിനെതിരെ വിമര്‍ശനം ഉയരുന്നുമുണ്ട്. ‘ടീച്ചറുടെ പോണ്‍ വീഡിയോ ആരെങ്കിലും ഉണ്ടാക്കുമോ? മഞ്ജു വാര്യരുടെ പോണ്‍ വീഡിയോ ഉണ്ടാക്കിയെന്ന് പറഞ്ഞാല്‍ അത് കേട്ടാല്‍ നമുക്ക് മനസിലാവും’ എന്നായിരുന്നു ഹരിഹരന് പ്രസംഗത്തിനിടെ പറഞ്ഞത്.
യുഡിഎഫും ആര്‍എംപിയും സംഘടിപ്പിച്ച പരിപാടിയിലായിരുന്നു ഹരിഹരന്റെ അധിക്ഷേപം. എന്നാല്‍ സംഭവം വിവാദമായതോടെ ആര്‍എംപി നേതാവ് മാപ്പ് പറഞ്ഞ് തടിയൂരാന്‍ ശ്രമിച്ചിരുന്നു. ഫേസ്ബുക്ക് പോസ്റ്റിലൂടെ ആയിരുന്നു ഹരിഹരന്റെ ഖേദപ്രകടനം. മോശം പരാമര്‍ശം ഉണ്ടായതില്‍ ഖേദം പ്രകടിപ്പിക്കുന്നു എന്നായിരുന്നു കുറിച്ചത്.
ഹരിഹരന് വിവാദ പരാമര്‍ശം നടത്തുമ്പോള്‍ പ്രതിപക്ഷ നേതാവ് വിഡി സതീശനും, വടകര മണ്ഡലത്തിലെ യുഡിഎഫ് സ്ഥാനാര്‍ത്ഥി ഷാഫി പറമ്പിലുമടക്കമുള്ളവര്‍ പങ്കെടുത്ത പരിപാടിയില്‍ വെച്ചായിരുന്നു വിവാദ പരാമര്‍ശം ഉണ്ടായതെന്നതും ശ്രദ്ധേയമാണ്. മറ്റ് നേതാക്കളുടെ പ്രതികരണങ്ങള്‍ ഇതുവരെ വിഷയത്തില്‍ വന്നിട്ടില്ല.
എന്നാല്‍ ഡിവൈഎഫ്‌ഐ ഉള്‍പ്പെടെ ഹരിഹരനെതിരെ വിമര്‍ശനം കടുപ്പിക്കുകയാണ്. വടകരയില്‍ യുഡിഎഫ് നടത്തിയ ഹീനമായ സ്ത്രീ വിരുദ്ധ പ്രചാരണങ്ങള്‍ക്ക് അടിവരയിടുന്ന പ്രസംഗമാണ് ആര്‍എംപി നേതാവ് നടത്തിയതെന്നാണ് ഡിവൈഎഫ്‌ഐ സംസ്ഥാന സെക്രട്ടറി വികെ സനോജ് ആരോപിക്കുന്നു. ശൈലജടീച്ചറെയും മഞ്ചു വാര്യരെയും അപമാനിച്ച ഹരിഹരന് എതിരെ ശക്തമായ നിയമ നടപടികള്‍ സ്വീകരിക്കണമെന്നും സനോജ് ആവശ്യപ്പെട്ടു.
കേരളം പെരുമഴക്കാലത്തേക്ക്… അഞ്ച് ദിവസത്തേക്ക് ശക്തമായ മഴ, യെല്ലോ അലര്‍ട്ട്
തിരുവനന്തപുരം: സംസ്ഥാനത്ത് എല്ലായിടത്തും വേനല്‍ മഴ എത്തിയതോടെ പൊള്ളുന്ന ചൂടില്‍ നിന്ന് ആശ്വാസം. മാസങ്ങള്‍ നീണ്ട കൊടുംചൂടില്‍ വലഞ്ഞിരിക്കുകയായിരുന്നു ജനങ്ങള്‍. അതിനിടെയാണ് വേനല്‍മഴ എത്തുന്നത്. നേരത്തെ തന്നെ സംസ്ഥാനത്തിന്റെ വിവിധ ഭാഗങ്ങളില്‍ മഴ എത്തിയിരുന്നെങ്കിലും ചിലയിടങ്ങളില്‍ മാറി നില്‍ക്കുകയായിരുന്നു. എന്നാല്‍ ഇന്നലെയും മിനിയാന്നുമായി ശേഷിക്കുന്നയിടങ്ങളില്‍ കൂടി മഴയെത്തി.
വരും ദിവസങ്ങളിലും സംസ്ഥാനത്ത് മഴ ലഭിക്കും എന്നാണ് കേന്ദ്ര കാലാവസ്ഥ വകുപ്പിന്റെ പ്രവചനം. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 64.5 മില്ലിമീറ്ററില്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് ഉദ്ദേശിക്കുന്നത്. ഇതോടെ വിവിധ ജില്ലകളില്‍ കേന്ദ്ര കാലാവസ്ഥാ വകുപ്പ് യെല്ലോ അലര്‍ട്ട് പ്രഖ്യാപിച്ചിരിക്കുകയാണ്.
കേന്ദ്ര കാലാവസ്ഥ വകുപ്പിന്റെ അടുത്ത അഞ്ച് ദിവസത്തേക്കുള്ള മഴ സാധ്യത പ്രവചനത്തിലാണ് വിവിധ ജില്ലകളില്‍ മഴ മുന്നറിയിപ്പ് നല്‍കിയിരിക്കുന്നത്. ഇന്ന് തിരുവനന്തപുരം, പത്തനംതിട്ട, എറണാകുളം, വയനാട്, കണ്ണൂര്‍ എന്നീ അഞ്ച് ജില്ലകളിലാണ് യെല്ലോ അലര്‍ട്ട് നല്‍കിയിരിക്കുന്നത്. നാളെ പത്തനംതിട്ടയിലും ഇടുക്കിയിലും യെല്ലോ അലര്‍ട്ടായിരിക്കും എന്ന് കാലാവസ്ഥാ വകുപ്പ് അറിയിച്ചു.
14-ാം തിയതി തിരുവനന്തപുരം, പത്തനംതിട്ട ജില്ലകളിലും 15-ാം തിയതി തിരുവനന്തപുരം, കൊല്ലം, പത്തനംതിട്ട ജില്ലകളിലും 16-ാം തിയതി തിരുവനന്തപുരം, കൊല്ലം, പത്തനംതിട്ട, ഇടുക്കി ജില്ലകളിലും യെല്ലോ അലര്‍ട്ടായിരിക്കും. അതേസമയം ഇന്ന് വൈകീട്ട് നാല് മണിക്ക് പുറത്തുവിട്ട അറിയിപ്പ് പ്രകാര അടുത്ത മൂന്ന് മണിക്കൂറില്‍ വിവിധ ജില്ലകളില്‍ മഴക്ക് സാധ്യതയുണ്ട് എന്നാണ് അറിയിച്ചിരിക്കുന്നത്.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, ഇടുക്കി, തൃശൂര്‍, കോഴിക്കോട്, വയനാട്, കണ്ണൂര്‍, കാസര്‍ഗോഡ് ജില്ലകളില്‍ ഒറ്റപ്പെട്ടയിടങ്ങളില്‍ ഇടിമിന്നലോട് കൂടിയ നേരിയതോ മിതമായതോ ആയ മഴയ്ക്കും മണിക്കൂറില്‍ 40 കിലോമീറ്റര്‍ വരെ വേഗതയില്‍ വീശിയേക്കാവുന്ന ശക്തമായ കാറ്റിനും സാധ്യതയണ്ട് എന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പില്‍ പറയുന്നത്.
അതേസമയം ഒരൊറ്റ മഴയില്‍ സംസ്ഥാനമൊട്ടാകെ താപനില കുറഞ്ഞു. കഴിഞ്ഞ ദിവസം പാലക്കാട് മഴ പെയ്തതോടെ ജില്ലയിലെ താപനില കുറഞ്ഞത് 5 ഡിഗ്രി സെല്‍ഷ്യസിന് മുകളില്‍ കുറഞ്ഞു. തൃശൂരില്‍ മൂന്ന് ഡിഗ്രി സെല്‍ഷ്യസിനും കോട്ടയത്ത് 2.5 ഡിഗ്രി സെല്‍ഷ്യസിനും മുകളില്‍ ചൂട് കുറഞ്ഞു.
കേവലം ഖേദപ്രകടനത്തില്‍ അവസാനിപ്പിക്കാനാകില്ല, ഹരിഹരന്റെ മാത്രം ആത്മനിഷ്ഠ പ്രസംഗമായി കാണുന്നില്ലെന്നും പി മോഹനന്‍
കോഴിക്കോട്: ആര്‍ എം പി നേതാവ് ഹരിഹരന്റെ സ്ത്രീവിരുദ്ധ പരാമര്‍ശത്തില്‍ രൂക്ഷ വിമര്‍ശനവുമായി സി പി എം കോഴിക്കോട് ജില്ലാ സെക്രട്ടറി പി മോഹനന്‍ രംഗത്ത്. സ്ത്രീവിരുദ്ധ പരാമര്‍ശം കെ എസ് ഹരിഹരന്റെ മാത്രം ആത്മനിഷ്ഠ പ്രസംഗമായി കാണുന്നില്ലെന്നാണ് പി മോഹനന്‍ പറഞ്ഞത്. യു ഡി എഫിന്റെ സൈബര്‍ ഗ്രൂപ്പുകളും ഇത്തരം പ്രചാരണം നടത്തിയിരുന്നുവെന്നും നേരത്തെയും ഇത്തരം പ്രചാരണങ്ങള്‍ ഉണ്ടായിരുന്നെന്നും അദ്ദേഹം പറഞ്ഞു.
യുഡിഎഫിന്റെ ഇരവാദം ആരും വിശ്വസിക്കില്ല. ഇന്ത്യ മുഴുവന്‍ ആരാധിക്കുന്ന സിനിമാ താരത്തെ അധിക്ഷേപിക്കുന്നത് കേവലം ഖേദ പ്രകടനം കൊണ്ട് അവസാനിപ്പിക്കാന്‍ കഴിയില്ലെന്നും പി മോഹനന്‍ പറഞ്ഞു. ഖേദ പ്രകടനം കൊണ്ട് വിഷയം അവസാനിക്കില്ലെന്നും നിയമ നടപടികള്‍ തുടരണമെന്നും അദ്ദേഹം ആവശ്യപ്പെട്ടു. സി എച്ച് കണാരനെ അധിക്ഷേപിച്ചതിലും നിയമനടപടി ഉണ്ടാകും. പരാമര്‍ശം തിരുത്തി എന്ന് പറയുന്നത് ഉരുണ്ടു കളിയാണെന്നും പി മോഹനന്‍ അഭിപ്രായപ്പെട്ടു.
ശൈലജ ടീച്ചര്‍ നേരത്തെ പറഞ്ഞത് വീഡിയോ ഉണ്ടെന്നല്ല വക്രീകരിച്ച ചിത്രം ഉണ്ടെന്നാണെന്നും അദ്ദേഹം വിവരിച്ചു. സൈബര്‍ പ്രചരണത്തില്‍ തന്റെ മകനെതിരെ ആക്ഷേപങ്ങള്‍ ഉണ്ടെങ്കില്‍ അതും അന്വേഷിക്കട്ടെയെന്നും സി പി എം ജില്ലാ സെക്രട്ടറി വ്യക്തമാക്കി. ചരിത്ര പിന്‍ബലം ഇല്ലാത്ത പ്രചാരണങ്ങള്‍ക്ക് മാധ്യമ പ്രവര്‍ത്തകരും കൂട്ടു നിന്നു. ആദ്യഘട്ടത്തില്‍ ടീച്ചര്‍ക്കെതിരെ വ്യക്തിഹത്യ നടന്നു. പിന്നീട് അത് വര്‍ഗീയ പ്രചാരണത്തിന് വഴിമാറി. പക്ഷേ മത നിരപേക്ഷ മനസ്സുകള്‍ കള്ള പ്രചാരണം തിരിച്ചറിഞ്ഞെന്നും ന്യൂനപക്ഷങ്ങള്‍ സി പി എമ്മിനോട് അടുക്കുന്നതില്‍ യു ഡി എഫിന് ആശങ്കയെന്നും സി പി എം കോഴിക്കോട് ജില്ലാ സെക്രട്ടറി അഭിപ്രായപ്പെട്ടു. യു ഡി എഫിന് സംഘപരിവാര്‍ മനസ്സ് ഉണ്ടെന്നും വോട്ടെണ്ണല്‍ അടുത്ത് വരുന്ന സാഹചര്യത്തിലുള്ള ബേജാറാണ് യു ഡി എഫിനെന്നും അദ്ദേഹം കൂട്ടിച്ചേര്‍ത്തു.
