നീറ്റ് നെറ്റ് പരീക്ഷ വിവാദത്തില് പ്രതിഷേധം ശക്തമാക്കി പ്രതിപക്ഷം. പാര്ലമെന്റ് വളയല് സമരത്തിന്റെ ഭാഗമായി കോണ്ഗ്രസ് നടത്തിയ മാര്ച്ചിലാണ് പൊലീസും പ്രവര്ത്തകരും തമ്മില് ഉന്തും തള്ളമുണ്ടായത്. കേന്ദ്ര സര്ക്കാരിനെതിരെ മുദ്രാവാക്യം മുഴക്കി പാര്ലമെന്റിലേക്ക് നടത്തിയ കോണ്ഗ്രസ് മാര്ച്ച് ദില്ലി പൊലീസ് തടഞ്ഞതോടെയാണ് സംഘര്ഷമുണ്ടായത്.
പ്രവര്ത്തകരെ പൊലീസ് അറസ്റ്റ് ചെയ്ത് നീക്കാന് ശ്രമിച്ചതോടെ ഉന്തും തള്ളമുണ്ടായി. സ്ഥലത്ത് ഇപ്പോഴും സംഘര്ഷാവസ്ഥ തുടരുകയാണ്. വിവിധ സംസ്ഥാനങ്ങളിലും പ്രതിഷേധത്തിന് ആഹ്വാനമുണ്ട്. പാട്നയില് ഉള്പ്പെടെ വിവിധയിടങ്ങളിലും കോണ്ഗ്രസിന്റെ നേതൃത്വത്തില് പ്രതിഷേധ മാര്ച്ച് നടന്നു.
ഇതിനിടെ, എന്എസ് യു നേതൃത്വത്തില് സര്വകലാശാല, ജില്ലാ തലങ്ങളിലും പ്രതിഷേധം ആരംഭിച്ചു. കേരളത്തിലും വിവിധയിടങ്ങളില് പ്രതിഷേധ സമരം നടന്നു. നീറ്റ് പരീക്ഷ ക്രമക്കേടില് പ്രതിഷേധിച്ച് കെഎസ്യു തൃശ്ശൂര് ജില്ലാ കമ്മിറ്റിയുടെ നേതൃത്വത്തില് എജി ഓഫീസിലേക്ക് മാര്ച്ച് നടത്തി. പരീക്ഷ റദ്ദാക്കില്ലെന്ന് സര്ക്കാര് വ്യക്തമാക്കിയതോടെ പ്രതിഷേധം ശക്തമാക്കാനാണ് പ്രതിപക്ഷ വിദ്യാര്ത്ഥി സംഘടനകളുടെ തീരുമാനം.
ഇതിനിടെ നെറ്റ് പരീക്ഷ ക്രമക്കേടില് സിബിഐ അന്വേഷണത്തിലേക്ക് കടക്കും. എന്ടിഎ അധികൃതരില് നിന്നടക്കം വിവരങ്ങള് തേടും.ചോദ്യപ്പേപ്പര് ചോര്ച്ച സംബന്ധിച്ച് എബിവിപിയും പ്രതിഷേധം കടുപ്പിക്കുകയാണ്. ജനങ്ങള് ചോദ്യം ഉന്നയിക്കുമ്പോള് സര്ക്കാര് മറുപടി പറയണമെന്ന് എബിവിപി പ്രതികരിച്ചു. എന്ടിഎയുടെ കോലം കത്തിച്ച് രാത്രി പ്രവര്ത്തകര് പ്രതിഷേധിച്ചു.
നീറ്റ്, നെറ്റ് പരീക്ഷകളിലെ ക്രമക്കേട് സിറ്റിങ് ജഡ്ജിയുടെ നേതൃത്വത്തില് അന്വേഷിക്കണമെന്ന് എസ്എഫ്ഐ ദേശീയ പ്രസിഡന്റ് വിപി സാനു ആവശ്യപ്പെട്ടു. നെറ്റ് പരീക്ഷ റദ്ദാക്കിയ സാഹചര്യത്തില് പരീക്ഷ എഴുതിയവര്ക്ക് എന് ടി എ യും കേന്ദ്ര സര്ക്കാരും നഷ്ട്ട പരിഹാരം നല്കണം. എന്.ടി.എ പിരിച്ചുവിടണം. കേന്ദ്ര വിദ്യാഭ്യാസ മന്ത്രി ധര്മേന്ദ്ര പ്രഥാന് രാജിവക്കണമെന്നും വിപി സാനു ആവശ്യപ്പെട്ടു.
എന്ടിഎ അക്കാദമി ബോഡിയല്ല. അത്തരം ഏജന്സിയാണ് പരീക്ഷ നടത്തുന്നത്. പരീക്ഷയിലെ ചോദ്യങ്ങളില് ഭരണഘടനയെ കുറിച്ച് ഇല്ല. എന്നാല്, പുരാണങ്ങളെ കുറിച്ചും രാമക്ഷേത്രത്തെ കുറിച്ചും ഉള്ള ചോദ്യങ്ങള് ഉണ്ടെന്നും വിപി സാനു ആരോപിച്ചു.
നെറ്റ് ചോദ്യപേപ്പര് ചോര്ച്ച; ഡാര്ക്ക് വെബില് 6 ലക്ഷം രൂപക്ക് വരെ വില്പന നടന്നു, ഞെട്ടിക്കുന്ന വിവരങ്ങള് പുറത്ത്
രാജ്യത്ത് യുജിസി നെറ്റ് പരീക്ഷയുടെ ചോദ്യപേപ്പര് ചോര്ന്ന സംഭവത്തിന്റെ കൂടുതല് വിവരങ്ങള് പുറത്ത്. ആറ് ലക്ഷം രൂപയ്ക്ക് വരെയാണ് ചോദ്യപേപ്പറുകള് വില്പനയ്ക്ക് വെച്ചതെന്നാണ് സിബിഐ അന്വേഷണത്തില് കണ്ടെത്തിയിരിക്കുന്നത്. പരീക്ഷയ്ക്ക് 48 മണിക്കൂര് മുമ്പ് ചോദ്യപേപ്പര് ചോര്ന്നുവെന്നും സിബിഐ കണ്ടെത്തി. സംഭവത്തില് സിബിഐ അന്വേഷണത്തിന്റെ പ്രാഥിക വിവരങ്ങളാണ് പുറത്തുവന്നത്.
ഡാര്ക്ക് വെബിലും ടെലഗ്രാമില് അടക്കം നെറ്റ് ചോദ്യപേപ്പറുകളുടെ വില്പന നടന്നുവെന്നും സിബിഐ എഫ്ഐആറിലുണ്ട്. സംഭവത്തില് ചില പരിശീലന കേന്ദ്രങ്ങളും സിബിഐയുടെ നിരീക്ഷണത്തിലാണ്. നെറ്റ് പരീക്ഷ ചോദ്യപേപ്പര് ചോര്ച്ചയില് ഞെട്ടിക്കുന്ന വിവരങ്ങളാണ് സിബിഐയുടെ അന്വേഷണത്തിലൂടെ പുറത്തുവരുന്നത്.
അതേസമയം, നെറ്റ് പരീക്ഷ പേപ്പര് ചോര്ച്ചയില് സിബിഐകേസെടുത്തു. ക്രമിനല് ഗൂഢാലോചന, വഞ്ചനയടക്കം വകുപ്പുകള് ചുമത്തിയാണ് കേസെടുത്തിരിക്കുന്നത്. വിദ്യാഭ്യാസ സെക്രട്ടറി നല്കിയ പരാതിയിലാണ് കേസെടുത്തത്. നീറ്റ് പരീക്ഷയ്ക്ക് പിന്നാലെ നെറ്റ് പരീക്ഷയിലും ക്രമക്കേട് കണ്ടെത്തിയതിനാല് വന് വിവാദത്തിനാണ് തിരികൊളുത്തിയിരിക്കുന്നത്. പരീക്ഷ റദ്ദാക്കിയതിന് പിന്നാലെ രൂക്ഷ വിമര്ശനമാണ് ഉയരുന്നത്. യുവാക്കളുടെ ഭാവി തകര്ക്കുകയാണെന്നും വീഴ്ചകള്ക്ക് സര്ക്കാര് ഉത്തരവാദിത്വം ഏറ്റെടുക്കണമെന്നും കോണ്ഗ്രസ് നേതാവ് പ്രിയങ്ക ഗാന്ധി ആവശ്യപ്പെട്ടു.
9 ലക്ഷത്തോളം വിദ്യാര്ത്ഥികള് ചൊവ്വാഴ്ച നെറ്റ് പരീക്ഷ എഴുതി എന്നാണ് കണക്ക്. രണ്ട് ഷിഫ്റ്റുകളില് ആയാണ് പരീക്ഷ നടത്തിയിരുന്നത്. ക്രമക്കേട് നടന്നുവെന്ന നാഷണല് സൈബര് ക്രൈം ത്രെട്ട് അനലിറ്റിക്സ് വിഭാഗത്തിന്റെ വിവരപ്രകാരമാണ് വിദ്യാഭ്യാസ മന്ത്രാലയം പരീക്ഷ റദ്ദാക്കിയത്. അതേസമയം, പരീക്ഷ പിന്നീട് നടത്തുമെന്നാണ് അറിയിപ്പ് ലഭിച്ചിരിക്കുന്നത്.
